Andres Ambühl n'è betg il giugader da hockey che sto avair la gronda tribuna. El n'è betg quel che festivescha grondas festas, u quel che celebrescha in record excessivamain. El prenda las marcas co ellas vegnan, ed uschia ha el segir plaschair dad avair cuntanschì in nov record, dentant pli impurtant è che l’equipa, che il HCD ha success.
Marcas e records imposants
Dapi 24 onns gioga Andres Ambühl hockey sin il pli aut livel. La stagiun 2000/2001 ha el fatg sco giuvenot da 18 onns sias emprimas experientschas en liga naziunala A, oz la National League, ed el dat anc adina hockey. E quai anc adina sin il pli aut livel. Durant tut quels onns è Andres Ambühl vegnì sis giadas campiun svizzer, el ha gudagnà pliras giadas la Cuppa Spengler, ed el è stà 19 giadas da la partida cun l’equipa naziunala ad in campiunadi mundial da hockey. En tut quels onns ha el dà duas giadas la partida da final, duas giadas ha el pers quella ed è uschia dubel vicecampiun mundial.
