Marcel Hug, Heinz Frei u Edith Wolf-Hunkeler èn gronds nums svizzers, sch'i va per il sport paralimpic en Svizra. Tuts trais han gudagnà numerusas medaglias ad eveniments gronds. Heinz Frei vala perfin sco in dals sportists svizzers cun ils pli gronds success insumma. 15 medaglias dad aur a gieus paralimpics ha el gudagnà en cursas da sutgas cun rodas. El è in pionier, quai che pertutga cursas da sutgas cun rodas.
Audiogalerie
Il sport paralimpic è sa midà durant ils ultims 60 onns
Il 1960 hai dà a Roma ils emprims gieus paralimpics. 400 atletas ed atlets ord 23 naziuns èn stads da la partida. Il 2016 a Rio èn 4'300 persunas ord 159 naziuns sa participads als gieus paralimpics. Cifras che mussan ch'igl è marschà insatge tar il sport cun impediments durant ils ultims decennis.
I n'è dentant betg uschia che mo la massa è creschida. Na, er la qualitad saja oz bler pli auta, di René Will, mainafatschenta da PluSport e president da «Swiss Paralympic». Igl haja dà temps, cura ch'igl era pulit simpel da gudagnar medaglias. La situaziun saja dentant sa midada.
Mo cun in zic talent na vegn ina sportista u sportist betg tar ina medaglia paralimpica.
Sin l'entir mund saja la muntada dal sport per persunas cun impediments creschì. Fitg blers pajais investeschian ozendi bler dapli che anc avant 20 u 30 onns. Oravant tut pajais ch'han realisà ils ultims onns gieus olimpics u gieus paralimpics han mess gronda paisa sin il sport per persunas cun impediment.
