Il coc dal club da sutgas cun roda Curia èn set enfin 10 persunas che s'inscuntran mintg'emna il mardi saira per far sport en cuminanza. Els fan sport popular sco balla arsa, basket ubain unihockey. Era l'aspect social ha ina gronda valur per ils commembers e las commembras che chattan la via en la sala da gimnastica Sand a Cuira.
Betg tut ils commembers èn en sutga cun roda
Era dus peduns sa participeschan al trenament polisportiv. Els han era la funcziun da gidanters per exempel per installar material grev. Sin l'emprima egliada na vesan ins sco aspectatura u aspectatur betg, tgi ch'è in pedun. Visitadras e visitaders vegnan bainprest dumandads, sch'els vulessan sa participar activamain al trenament. Immediat è pronta ina sutga cun rodas per il giast che po empruvar e far atgnas experientschas.
Sutgas cun roda spezialas
Per far sport dovran las sportistas ed ils sportists autras sutgas cun rodas che en lur mintgadi. Quellas èn pli adattadas per far sport. Uschia han quellas ina pintga roda davostiers che dat dapli stabilitad. Las rodas da la vart èn montadas en in auter angul per che la sutga cun rodas saja pli movibla. Ins po cumparegliar la cumbinaziun dal material cun in velo: ina rama, duas rodas ed ina sella. Dentant custan las sutgas cun rodas per far sport tranter 8'000 e 10'000 francs. Ils sportists e la soportistas vegnan sustegnids dad ina fundaziun.
Ils giuvens mancan
Empè che las cifras da commembers activs crescha, s'augmenta be la vegliadetgna media dals commember adina pli e pli fitg. Mintgina e mintgin, vegl e giuven, peduns u en sutga cun rodas è bainvegnì tar il club da sutgas cun rodas per far sport.
