A la cursa da cuppa mundiala a Veysonnaz en il Vallais è il skicrosser grischun Alex Fiva vegnì segund. El è sa classà suenter il victur svedais David Mobärg. Terz è vegnì il Tudestg Florian Wilmsmann. Questa segunda plazza è la tschintgavla giada che Alex Fiva va questa stagiun sin il podest. Uschia surpiglia il Grischun la testa en il classament general. Actualmain maina el quel cun 47 puncts avant il Canadais Reece Howden. I spetgan anc duas cursas e quai proxima fin d'emna ad Idre Fjäll en Svezia.
Ils auters Svizzers n'han betg reussì – sulettamain Marc Bischofberger è vegnì en la runda da k.o.
Schanzas da gudagnar il classament
Uschia ha Alex Fiva cun ses 38 onns la schanza da gudagnar la segunda giada la culla per il meglier skicrosser da la stagiun. Gia il 2013 era quai reussì ad el da gudagnar il classament general. Impressiunant è quai cunzunt perquai che Alex Fiva è turna questa stagiun enavos en la cuppa mundiala suenter ch'el avevà rut il liom cruschà il december 2023.
Staziun finala quartfinals per las dunnas
Las dunnas svizras n'han betg persvadì sin la naiv vallesana. Bain èn Talina Gantenbein da Scuol, Saskja Lack, Sixtine Cousin, Margaux Dumont e Isabelle Zippert vegnidas enfin en ils quartfinals. Là èsi però stà finì per tut las atletas da Swiss Ski. La leadra da l'equipa svizra Fanny Smith n'è betg stada a la partenza. Quai suenter sia cupitgada en il trenament. La finala hai dà in triumf traidubel canadais cun la victura Marielle Thompson. Il podest cumpletteschan sias duas collegas d'equipa Brittany Phelan ed India Sherret.