Alex Fiva è gia stà nominà pliras giadas ils davos 10 onns. Uss hai finalmain tanschì da daventar il meglier sportist grischun da l’onn, quai cun 36 onns. Quest titel è franc merità. Avant in onn è il sportist da Parpan che viva dentant cun sia famiglia a Cuira daventà campiun mundial da skicross e quest onn ha el gudagnà als gieus olimpics a Peking la medaglia d’argient.
Tegnì la laudatio per Alex Fiva ha il quatter-dubel campiun olimpic Dario Cologna ch’ha terminà sia carriera avant bun dus mais. Auter che Cologna u er Carlo Janka u Nevin Galmarini ch’èn tuts tuttina vegls, cuntinuescha il skicrosser sia carriera. El prendia ussa dentant stagiun per stagiun, uschia Alex Fiva. La finamira per la proxima stagiun saja en mintga cas da defender il titel da campiun mundial.
Onur per Nadja Kälin
Sco meglra sportista giuvna dal Grischun è vegnida onurada Nadja Kälin. La passlunghista da San Murezzan tutga cun ses 21 onns gia uss tar ina da las pli fermas atletas svizras en las cursas da distanza. Il 2020 è ella daventada campiunessa mundiala en la cursa da staffetta da las junioras. La davosa stagiun ha Kälin dastgà parter per l’emprima giada a gieus olimpics. Sco finiziun da la stagiun ha ella gudagnà sia cursa da chasa, il maraton da l’Engiadina.
Sco funcziunaria e trenadra da l’onn 2022 è vegnida onurada Sonja Bonell che s’engascha principalmain per ils giuvens dal BTV Cuira. Il titel per il club da l’onn va al RMV Cuira, il club da velo e mountainbike Cuira.
