Dumandà en quest temp da Corona è principal er il scheftrenader Beat Tschuor. El è il mument dapli psicolog che trenader. Tschuor sto adina puspè metter l’entira planisaziun sin il chau ed er communitgar a las atletas ils resultats positivs ed uschia trametter las pertutgadas en isolaziun. Quai na saja betg ina simpla situaziun, per nagin, di il scheftrenader da Sursaissa.
Tschuor metta en dumonda la «bubble»
Fugir da corona n’è il mument betg pussaivel, er betg sche atletas ed atlets da la cuppa mundiala sa movian be en ina uschenumnada «bubble». Quella metta Beat Tschuor dentant en dumonda – l’entira situaziun na saja il mument betg optimala. Er perquai che tut las equipas sa chattan quasi en il medem lieu. Ina pussaivladad fiss da prender dimora durant questa pandemia en in agen hotel in zic davent da l’entir circus da skis. Ma er quai na saja betg uschè simpel, manegia Beat Tschuor. Els stoppian er sa tegnair vid il reglament e las directivas da la FIS che cumonda nua che las equipas ston sa chasar durant la cuppa mundiala da skis. Ils mauns da Tschuor èn uschia er in pau liads.
Il mument ston las skiunzas da la cuppa mundiala viver cun la situaziun e sperar da mitschar uschè bain sco pussibel dal coronavirus, principal er en vista al punct culminant da la stagiun, ils gieus olimpics a Peking che cumenzan en bun in mais.
