Tant Ornella Poltera sco era Daniel Bolt han mess la basa per quest success en la cursa dal Transruinaulta, il maraton da trail sur 42,2 kilometers e cun 1’800 meters differenza d’autezza da Glion tras la Ruinaulta fin a Tusaun. Poltera ha gudagnà quest maraton tar las dunnas, Bolt è vegnì segund tar ils umens. En la cursa dal Transviamala in di pli tard è Poltera vegnida 7avla e Bolt 9avel, quai ch’ha la finala tanschì per gudagnar la curuna ed uschia daventar la nova regina, respectiv il nov retg da las chavorgias Ruinaulta e Viamala.
Raphael Sprenger ed Ornella Poltera triumfeschan al Transruinaulta
Tar la terza ediziun dal Transruinaulta hai dà duas premieras. Tar ils umens ha Raphael Sprenger triumfà, tar las dunnas Ornella Poltera. Omadus èn stads per l’emprima giada a la partenza al maraton da trail da Glion fin a Tusaun cun partenza d’interval.
Dapli
Raphael Sprenger, il currider da 29 onns da Turitg, ha gudagnà il Transruinaulta 2016 en in temp da 3:25.32 uras ed è uschia stà 35 secundas pli spert che Daniel Bolt da Schiers ch’era gia vegnì l’onn passà segund. Terz cun in retard da passa 4 minutas sin Sprenger ha cuntanschì l’arrivada a Tusaun il giuven Elias Gemperli da Frauenfeld.
Transruinaulta
In clera victoria hai dà en la cursa da las dunnas. Là ha la mattadura locala Ornella Poltera triumfà en 4:13.02 uras. La curridra da Domat è stada passa 4 minutas pli sperta che la tudestga Waltraud Berger. Terza è vegnida Valerie Girsberger da Nürensdorf.
Impressiuns dal Transruinaulta 2016
-
Bild 1 von 11Legenda: Ornella Poltera n'ha laschà nagina schanza a la concurrenza al maraton da trail Transruinaulta. RTR, Andreas Wieland -
Bild 2 von 11Legenda: Raphael Sprenger, il victur dal Transruinaulta 2016. RTR, Andreas Wieland
-
Bild 3 von 11Legenda: Ornella Poltera ha cuntanschì sco emprima dunna l'arrivada a Tusaun. RTR, Andreas Wieland
-
Bild 4 von 11Legenda: Daniel Bolt da Schiers, segund al Transruinaulta, vid dar pled e fatg davart si'aventura. RTR, Andreas Wieland
-
Bild 5 von 11Legenda: Culissa magnifica tras la Ruinaulta tranter Glion e Bonaduz. mad
-
Bild 6 von 11Legenda: Partenza d'interval al Transruinaulta, quai giu dad in crap avant la chasa cumin a Glion. RTR, Andreas Wieland
-
Bild 7 von 11Legenda: A Versomi spetga in grond e lartg buffet sin ils participants dal maraton da trail Transruinaulta. RTR, Andreas Wieland
-
Bild 8 von 11Legenda: Sandro Herrmann da Domat sin in dals pli spectaculars trails entamez la Ruinaulta. RTR, Andreas Wieland
-
Bild 9 von 11Legenda: Forsa betg sa legrar memia baud cun la concurrenza en il dies. RTR, Andreas Wieland
-
Bild 10 von 11Legenda: In zic motivaziun dovra mintginA – qua en furma musicala avant che bandunar Versomi. RTR, Andreas Wieland
-
Bild 11 von 11Legenda: In zic urden sto esser per chattar il dretg satgados en l'arrivada a Tusaun. RTR, Andreas Wieland
Premieras al Transviamala
Jonathan Schmid dad Adelboden e Nicole Battaglia d'Almens han gudagnà la cursa populara sur 19 kilometers da Tusaun tras la Viamala fin a Donat. Schmid ch'è sa participà l'emprima gia al Transviamala ha gudagnà en in temp da 1:19.25 uras. Schmid ha propi distanziar l’entira concurrenza e battì il segund, Arnold Aemisegger da Triesenberg, per bunamein 4 minutas e mesa. Il currider dal Principadi dal Liechtenstein aveva triumfà il 2015. Terz è vegnì piz a cup il Tudestg Simon Dörflinger.
Ina cursa pli stretga èsi stà tar las dunnas. Nicole Battaglia ha gudagnà en 1:38.17 uras. La curridra d’Almens è stada bun 30 secundas pli sperta che Edith Kortekaas-Amelsfoort, la curridra Ollandaisa ch’abitescha a Versomi. Terza cun in retard da 43 secundas è vegnida la Tudestga Alexandra Hagspiel.
La Transviamala Curta, la cursa sur 11 kilometers, ha gudagnà l’indigen Sandro Michael da Ziràn en bun 53 minutas. Tar las dunnas ha triumfà Doris Kropf da Rabius en 1:10.42 uras.
-
Bild 1 von 5Legenda: Jonathan Schmid è stà ina classa per sasez al Transviamala 2016. RTR, Andreas Wieland
-
Bild 2 von 5Legenda: Jonathan Schmid dad Adelboden ha mussà tgi ch'è il spert tras la Viamala. RTR, Andreas Wieland
-
Bild 3 von 5Legenda: Partenza dal Transviamala amez il vitg da Tusaun. RTR, Andreas Wieland
-
Bild 4 von 5Legenda: A Donat spetga sin mintga participant in bun toc turta. RTR, Andreas Wieland
-
Bild 5 von 5Legenda: Il buffet da turtas a Donat fa onn per onn gust ad in e scadin. RTR, Andreas Wieland
Cuntent dad A fin Z
Il comité d’organisaziun da las cursas Transruinaulta e Transviamala èn fitg cuntents cun l’ediziun 2016. Las duas cursas sajan danovamain stadas in success cumplain, di Daniel Camenisch. Tut en tut sajan bun 2’000 curridras e curriders stads a la partenza. La cursa dal Transviamala ch’è vegnida organisada quest onn gia per la 15avla giada è gia dapi onns vendida ora cun ils milli plazs da partenza limitads.
Il Transruinaulta ha carmalà quest onn passa 500 curridras e curriders, bun 20% dapli ch’il 2015. Plinavant han ils organisaturs er gì cletg cun l’aura. Malgrà las temperaturas bassas saja stà aura grondiusa ed ina culissa magnifica per currer, uschia Camenisch.
Las cursas Transruinaulta e Transviamala valan sco duas da las pli bellas cursas da currer lunsch sur il cunfins grischuns. La proxima ediziun da Transruinaulta e Transviamala datti l’october 2017.
RR sportissimo 17:00