Cun plaschair e bler motivaziun, senza propi savair tge che spetga, han las damas 30+ da Trun laschà cumenzar lur aventura en la liga naziunala B. En ils emprims dus duels a chasa han la Sursilvanas beneventà adversarias classifitgadas meglier. Ellas han cumbattì ma la finala pers omadus duels cun 1 a 5 (tar mintga duel da gruppa vegn giugà 4 partidas singulas e dus gieus dubels).
Il terz duel da gruppa, ordaifer encunter Küssnacht a.R., è lura stà uliv tant na dals gieus sco era na da las classificaziuns da las adversarias. Omaduas equipas pon nudar mintgamai 3 victorias. Malgrad quest pari restan las giugaduras da Trun sin l'ultim plaz da gruppa. Tge che munta ch'il duel da promoziun decida sch'ellas restan en la NLB ni sch'i va enavos en la C.
Tuttina promoziun en la liga naziunala B
La fin da schaner ha l'equipa survegnì la dumonda da Swiss Tennis sch'ella vul ir si e giugar en liga naziunala B. Ina sort regal da Nadal retardà, raquinta la capitania Sereina Decurtins.
Ditg temp da ponderar n'han ellas dentant betg gì. La federaziun ha spetgà lur resposta entaifer dus dis. Bain ha l'equipa – che consista da sis giugaduras – stuì far in, dus patratgs. Ma detg svelt è stà cler, che quai è ina schanza, ch'ellas stoppian prender ed empruvar. L'emprima fin d'emna da matg cumenza uschia l'aventura per las giugadras 30+ dal club da tennis da Trun.
Betg dumagnà or d'atgna forza la promoziun
Igl è stà magari piter per las damas da Trun a la fin da l'ultima stagiun, cura ch'ellas han gì manchentà la promoziun en liga naziunala B. E quai cun avair gì gudagnà tuttina blers gieus sco las adversarias da Herrliberg. Davart l'ir si u betg ha lura il total da sets gudagnads sur tut las partidas decidì. Plinavant l'emprim dals dus gieus dubels che Trun ha pers. Betg perder e tuttina betg vegnir promovidas, quai ha dà in mument da morder.
Nus n'avain nagut da perder ed essan spanegiadas.
En ils tgaus da las giugaduras era dentant l'eventuala opziun, che Swiss Tennis pudess forsa tuttina promover ellas pervia da lur fermas prestaziuns. Cunquai ch'ins n'ha fin Nadal udì nagut, n'han ellas betg pli quintà che la federaziun s'annunzia. La fin da schaner lura la surpraisa. Il plaschair grond, era sch'ellas n'han nagina idea nua ch'ellas stattan e quant fermas che las adversarias èn. Lur finamira è d'empruvar da pudair tegnair pitg e gugent restar en quella liga pli auta.
Quai è ina schanza che fa grond plaschair.
Nus vulain dar buns gieus ed empruvain da restar en la B.
Da nov cun in trenader che duai gidar cun la tactica
En vista a lur aventura e missiun da gugent restar en liga naziunala B da las 30+ e betg gist a la fin da la stagiun puspè vegnir relegadas na surlaschan las da Trun nagut a la casualitad. Las ultimas emnas han ellas dumandà Nic Dermon da dar inqual input e da filar cun ellas vi da mecanissems cementads e laschar giugar ellas pli variant.
Nic Dermon ha durant 40 onns gì ina scola da tennis a Mustér. Er uss, ch'el è pensiunà, dat el anc adina lecziuns. E cur che las giugaduras da Trun eran anc mattettas e junioras ha el gia trenà ellas. Nic Dermon ha plaschair, da pudair gidar ellas, ma era che lur via ha manà ellas fin en liga naziunala B. Er el è spanegià tge che gartegia en ils duels encunter las damas dals clubs da Wallisellen, Altstätten e Küssnacht a.R. En quella categoria da 30+ èn las damas da Trun dal reminent la suletta equipa grischuna. Meglieras che las Sursilvanas èn be las dunnas da Panaduz che dattan en liga naziunala A e ch'han terminà l'ultima stagiun sco campiunessas svizras.