Las dunnas da tennis da Trun 30+ na dumognan betg la promoziun en liga naziunala B e quai per in soli set. L'ultim duel ordaifer encunter Herrliberg va a fin cun in pari da 3 a 3 gieus. Malgrà quest pari restan las Sursilvanas en la liga naziunala C. Decidì davart la promoziun ha a la fin il dumber dals totals sets guadagnads sur tut las partidas e plinavant l'emprim dals dus gieus dubels che Trun ha pers. Suenter ils quatter gieus singuls stevi pari 2 a 2. En la fasa decisiva cun ils dus dubels èn las Turitgaisas idas cun in pitschen avantatg. Suenter ch'ellas avevan gudagnà en ils singuls total tschintg sets e las Sursilvanas quatter. Era ils dubels van a fin pari, cun ina victoria per Trun ed ina per Herrliberg.
Betg pers e tuttina betg idas si
Manchentar la promoziun en liga naziunala B uschè stretg, senza propi avair pers, è piter. Il frust e la trumpada ch'i n'ha betg tanschì èn dentant stads da curta durada tar las giugadras da Trun. Gist en lur emprima stagiun en la liga naziunala C da la categoria 30+, èn ellas idas da victoria a victoria. Han terminà la fasa da gruppa sin l'emprim plaz ed han pudì giugar per la promoziun.
Al cumenzament da lur aventura en liga naziunala C avevan ellas plitost pensà ch'i dettia in cumbat encunter la relegaziun ed èn lur sezzas stadas in pau surstadas da lur success. Suenter la fin magari dramatica en l'ultim duel da promoziun hai la finala tunà unisono or da las buccas da las Sursilvanas: «Nus dastgain esser loschas da quai ch'avain mussà e cuntanschì». L'equipa da Trun 30+ è dal reminent la suletta equipa grischuna en liga naziunala C.
Victoria cunter Renens
La sonda avant aveva l’equipa da tennis da las dunnas 30+ da Trun gudagnà cun 6:0 l'emprim duel da promoziun per la liga naziunala B encunter Renens. Las damas da la Svira Franzosa eran dentant arrivadas be cun trais empè da minimum quatter giugadras (uschia il reglament) en Surselva. In gieu singul ed in dubel èn uschia ids gia l’entschatta a favur da las damas da Trun cunquai che Renens ha cunterfatg al reglament. Ils trais gieus singuls han las Sursilvanas gudagnà tuts. Las Romandas han sin quai desistì sin il gieu dubel.
