«Mes siemi è da dar ina giada per Barcelona». Quai haja el adina ditg da buob. Durant ils davos onns è Fabrizio Cavegn ì pass per pass sia via. Gia il 2019, cura ch'il giuven cun chavels stgirs curts aveva 17 onns, ha RTR l'emprima giada discurrì cun il Lumnezian davart la gronda finamira da daventar profi da ballape. Gia lura è el sa mussà sco giuven che sa exact tge ch'el vul.
Oz cun 21 onns na dat Fabrizio Cavegn betg ballape per il FC Barcelona, ma el ha dumagnà da far il pass en il ballape professiunal. Dal reminent sco emprim Rumantsch dapi Paul Friberg ( Son Gagl, Wettingen, Lucerna) ed Erni Maissen (Basilea, YB, Turitg ) che han spezialmain en ils onns 70-80 dà ballape sin nivel professiunal.
Dapi la stad 2023 è el giugadur tar il FC Vaduz en la Challenge League. Temp da climatisar n'ha el betg duvrà en il Principadi. Davent dal cumenzament è Fabrizio Cavegn stà giugader da tschep ed en sia emprima stagiun ha el dà tut ils gieus da campiunadi. Sias cifras tschantschan per sasez: 36 gieus, 12 gols e trais assists. Ina fitg buna quota per sia emprima stagiun sin nivel professiunal. El è, sch'el guarda enavos, cuntent cun sias prestaziuns. Savend ch'el avess era anc pudì fa dapli gols.
Il trenader da Vaduz, Marc Schneider descriva Fabrizio Cavegn sco giugader fitg focussà, ambiziunà cun ina mentalitad positiva. Dentant è el da l'opiniun che anc dapli fiss pussaivel
Fabrizio pudess anc far dapli gols. Ils ultims mais ha el dentant fatg in grond svilup. El dat bler pli clever e na va betg pli cun il chau atras la paraid.
Fabrizio Cavegn ha siemià da pitschen, sco blers, da vegnir ina giada profi da ballape. Sia via n'è dentant insumma betg stada tipica. Cun 16 onns deva il Lumnezian ballape tar la US Schluein Glion en 3. liga. Suenter ha el fatg il pass tar l'equipa U18 dal team Südostschweiz nua ch'el ha propi chattà il regl da sajettar gols. Il potenzial è stà evident, uschia ch'el ha cun strusch 19 onns midà tar il FC Son Gagl. Cun fermas prestaziuns e blers gols en la U21 dal club da la Super League ha Fabrizio Cavegn mussà sias abilitads. Ed el è vegnì remunerà cun ses emprims gieus en la Super League.
Quels gieus cun la naziunala èn segir stà in dals pli bels muments da mia carriera fin qua.
Martgà da transfer
La valur da Fabrizio Cavegn sin il martgà da transfer è sa meglierada cuntinuadamain e quai sa mussa en ses svilup da sia carriera. Cura ch'el ha terminà ses temp tar il FC Son Gagl, era sia valur da martgà anc 250'000 euros. Gia en sia emprima stagiun da profi ha el dentant dumagnà d'augmentar la valur sin 350'000 euros. Ed ussa? Sia valur sin il martgà da transfer è uss 450'000 euros!
Tge porta il futur
La stad 2023 ha il Lumnezian midà da Son Gagl a Vaduz en la Challenge League. Per l'attatgader insumma betg in pass enavos. Finalmain è el numnadamain stà part fixa d'ina equipa da profi. A Son Gagl era el giugader da la U21 e sco Fabrizio Cavegn di sentiva el ch'il club metta buc dal tuttafatg sin el. L'atun passà, gia suenter paucs gieus per Vaduz nua ch'el ha persvas, è el vegnì nominà per l'equipa naziunala svizra U21. Ina fitg gronda onur per l'attatgader. En dus gieus ha el pudì purtar il tricot cotschen cun la crusch sin il pèz.
Sia emprima stagiun tar il FC Vaduz tutga uss gia tar il passà. El ha mussà ch'el sa er sin nivel da profi sajettar ses gols. Ses contract tar il club dal Liechtenstein cuzza fin la stad 2026. Ma cler è ch'il giuven da 21 onns ha anc pli grondas finamiras, da dar bainbaud en la Super League u lura era en l'exteriur. Uschia èsi er bain pussaivel ch'el vegn a bandunar Vaduz anc avant la fin da ses contract.
