Igl è stà in veritabel exploit dal quartet svizzer cun ils trais grischuns Jonas Baumann, Valerio Grond, Jason Rüesch ensemen cun Cyril Fähndrich. Per l’emprim giada dapi 53 onns a Sapporo turna ina staffetta svizra da passlung a chasa dad in campiunadi mundial cun ina medaglia.
La medaglia d’argient è cunzunt per il pli rutinà en l’equipa svizra, Jonas Baumann, ina gronda satisfacziun. Durant ses 15 onns ch’el fa part a la cuppa mundial n’ha il passlunghist oriund da Lon en la Val Schons betg adina gì simpel. Avant bun 8 onns ha Baumann stuì surmuntar sia pli gronda crisa. El era crudà en in burnout e gì depressiuns da stancladad. Il currider che viva gia dapi blers onns cun sia famiglia a Tavau n’ha però mai dà si ed ha chattà la via enavos ed il plaschair vid il sport. Ed ussa encunter la fin da sia carriera po el festivar ses pli gronds success insumma. Gia il schaner en l’Engiadina era Baumann stà l’emprima giada insumma sin in podest da la cuppa mundiala.
Jau hai adina siemià dad ina medaglia, n’hai mai dà si, er betg durant mes temp pli difficil, ed uss èsi sa chapescha fitg bel ch’igl è gartegià.
Spezial saja er d’astgar parter questa medaglia e tut las emoziuns cun ses collegas d’equipa, cun quellas persunas ch’el treneschia di per di e saja uschè bler da viadi. Ed el saja er adina stà realist ch’el haja sulet la schanza da gudagnar ina medaglia en ina cursa da staffetta. En ina cursa singula saja per el gia in plaz aifer ils top 10 in grond success.
Per mai fissi era stà ok, sche jau n’avess gudagnà nagina medaglia. Jau sun cuntent cun tut quai ch’jau hai fatg atras e sun er loschs da mia carriera.
Sulet per la gronda festa n’hai anc betg tanschì. Ma suenter la stagiun dettia franc avunda temp per celebrar endretg questa medaglia, e sin quai mument sa legria el fitg, uschia Jonas Baumann. Ed anc pli fitg sa legra Jonas Baumann sin dapli temp cun la famiglia en l’avegnir. A Lahti en Finlanda vegn el a currer en duas emnas sia davosa cursa da la cuppa mundiala. Silsuenter vegni el a terminar sia carriera, quai ha Baumann er communitgà vers SRF suenter sia davosa cursa a Trondheim, la cursa da 50 kilometers ch’el ha la finala dà si ord motivs da sanadad. Jonas Baumann veva dà ses debüt en la cuppa mundiala il december il 2009 a Tavau.