L'EHC Arosa gioga er l’autra stagiun en la MyHockey League. Il club na fetschia betg la dumonda da promoziun en la Swiss League, hai num en ina communicaziun. Malgrà questa decisiun restia la finamira da gudagnar il titel en la MyHockey League, la liga la terz auta en Svizra. Dentant correspundan las prestaziuns sportivas actualmain betg a questa finamira: Arosa sa chatta sin il 7avel plaz da la tabella ed ha 13 puncts retard sin il leader Cuira.
EHC Cuira ha inoltrà la proposta da midar tar Swiss League
L'EHC Cuira vul far il pass en la Swiss League. Quai scriva il club da hockey en ina communicaziun. Ina dumonda correspundenta haja l’EHC Cuira inoltrà a la federaziun da hockey Svizra. Cun ina clara visiun e strategia veglia il club da hockey cuntanscher questas finamiras sportivas, organisatoricas e finanzialas.
Gia l'onn passa ha l'EHC Cuira fatg questa dumonda a la federaziun da hockey Svizra. Pli tard avevan els alura puspè retratg questa dumonda per motivs finanzials.
