L’entir mais da zercladur stat en il segn dal sport da tir. Durant trais fin d’emnas han numnadamain lieu las occurrenzas da la festa da tir chantunala 2024 nua che passa 8’000 tiraduras e tiradurs sa participeschan.
Lantschada vegn la festa da la giuventetgna la fin d’emna dals 8 e 9 da zercladur a Samedan e San Murezzan. Per il tir sur 300 meters, che ha lieu a Samedan, e nua ch’i va per il titel dal campiun Grischun, sa participeschan 100 uffants e giuvenils. A San Murezzan han lieu las occurrenzas d'armas a caliber pitschen e pistola.
La giuventetgna è l’avegnir
Dals 100 finalists èn 29 atletas ed atlets dal district da tregants Bernina. Els treneschan sut la batgetta dal Bregagliot, Attilio Tam.
Cun 40 atletas ed atlets avain nus il pli grond curs da tiradurs en il Grischun.
Dapi l’onn passà maina Attilio Tam in curs da tregants giuvens regiunal – quai cun success. Numnadamain hai dà gia per l’emprim curs passa 30 annunzias. Quest onn èn gia passa 40 giuvnas e giuvens da la partida. Il motiv per quel grond interess, vesa Attilio Tam oravant tut tar la decisiun da porscher in curs regiunal, central.
Tar ils tregants giuvens da las Vals dal Sid na giaja betg en emprima lingia per absolver occurrenzas da tir, mabain er per garantir l’avegnir da las societads da tregants. Tuttina fetschia grond plaschair da pudair sa concurrenzar cun auters e cun bunamain 30 atletas ed atlets en il final sajan medaglias cler la finamira.
