Il campiun svizzer da maraton, Marc Stutzmann e ses partenari da la Tschechia, Martin Stosek, han gudagnà il Swiss Epic 2023 ch’ha manà quest onn da Lai a San Murezzan fin a Tavau. Il duo svizzer-tschec ha gudagnà trais da las tschintg etappas ed uschia er il classament general.
La davosa etappa sur 59 kilometers cun 1750 meters differenza d’autezza cun partenza ed arrivada a Tavau han Stutzmann e Stosek gudagnà solo, quai cun in avantatg da 1:08 minutas sin l’Austriac Daniel Geismayr e Wout Alleman da la Belgia ch’han terminà il Swiss Epic sin il segund plaz. Sur tschintg dis ha quai duo ch’ha gudagnà la terza e quarta etappa pers 7:38 minutas sin Martin Stosek e Marc Stutzmann. Vegnì terz en la davosa etappa sco er en il classament general è il duo cun il Tudestg Simon Schneller ensemen cun il Franzos Axel Roudil Cortinat.
Fadri Barandun sut ils top 5
Ina grondiusa prestaziun ha er Fadri Barandun mussà durant questa cursa da 5 etappas. L’Engiadinais ch’è partì ensemen cun Konny Looser è vegnì 5avel en la davosa etappa a Tavau (+4:41 minutas) ed er en il classament general è il duo svizzer classà sin il 5avel plaz cun in retard da 34:20 minutas.
Vera Looser e Kim Le Court ina classa per sa sezzas
Tar las dunnas n’èn Vera Looser da la Namibia e Kim Le Court da Mauritius betg stadas da franar, quai malgrà la crudada da venderdi da Le Court. Quest duo african ha gudagnà quatter da tschintg etappas ed uschia gudagnà suveran l’ediziun dal Swiss Epic 2023. En il classament general han ellas la finala in avantatg da 42:07 minutas sin la Svizra Irina Lützelschwab ch’è sa participada ensemen cun Katazina Sosna da la Lituania.
Sascha Deplazes sin il podest
Er cuntanschì in plaz da podest, quai en la categoria dals umens masters ha Sascha Deplazes da Mustér. Ensemen cun Marcel Fürer è vegnì terz a quai Swiss Epic, quai cun in retard da bun in’ura sin ils dus dominaturs en questa categoria, ils dus anteriurs mountainbikers da la cuppa mundiala, Florian Vogel e Martin Gujan dal Partenz.
Tut en tut èn stads a la partenza radund 600 atletas ed atlets ord 45 naziuns. Durant 5 etappas è stà da surmuntar 339 kilometers cun 10’850 meters differenza d’autezza. Er il 2024 vegn il Swiss Epic a manar tras il Grischun, quai gia per la 6avla giada en roda.
Schumellinas a la partenza
Il Swiss Epic è ina cursa speziala, quai betg sulet perquai ch’ella cuzza plirs dis ed è ina cursa extrema, mabain era perquai ch’igl è ina cursa en dus. Ins cumenza e finescha la cursa en teams da dus. Tranter auter stadas a la partenza èn er Léa e Petra Thüring da la Svizra Centrala. Ellas n’èn betg sulet soras, mabain schumellinas. E ch’ellas enconuschan fitg bain ina l’autra ed armoniseschan uschia er bain mussa il resultat. Léa e Petra Thüring han terminà il Swiss Epic 2023 sin il segund plaz en la categorias da las dunnas masters.
Sin rtr.ch e PlayRTR pudais Vus seguir las atletas ed ils atlets sur culms e vals en il livestream. Tar trais etappas datti in giast rumantsch. En l'ultima è quai Andrin Beeli. El è gia sa participà al Swiss Epic e fiss era quest onn stà a la partenza. Pervia d'ina blessura sto il mountainbiker da Sagogn dentant guardar tiers.
Sper quai datti reacziuns ed istorgias or da la scena da mountainbike.
Temp da livestream:
- Etappa 1 Lai: 08:40 – 13:00
- Etappa 2 Lai – San Murezzan: 07:40 – 13:00
- Etappa 3 San Murezzan: 07:40 – 13:00
- Etappa 4 San Murezzan – Tavau: 07:40 – 13:00
- Etappa 5 Tavau: 08:10 – 18:00 (cun ceremonia da victuras e victurs)
