La penultima etappa dal Swiss Epic vala sco «Queen-Stage». Cun 73 kilometers ha spetgà in'etappa lunga, ch'è era stada pretensiusa pervi dal terren e la stipa muntada sin il Pass da Scaletta, da San Murezzan a Tavau.
Suenter lur victoria dad ier gudogna er oz tar ils umens l'equipa Wilier Pirelli. Daniel Geismayr da l'Austria e Wout Alleman da la Belgia battan Martin Stošek e Marc Stutzmann en in sprint dramatic a Tavau. Stošek e Stutzmann, che han gudagnà las emprimas duas etappas, restan sin plaz 1 da la classificaziun generala. Quai cun 6:30 minutas reserva sin Willier Pirelli.
Er il rumantsch Fadri Barandun cun ses collega da team Conny Looser han mussà ina prestaziun ferma ed han finì l'etappa regina sco 5avels.
Drama tar las dunnas
Tar las dunnas hai dà in’etappa dramatica. Suenter 30 kilometers eran las duas meglras equipas Elysator Efficient Infinity Insure e Davos Klosters puspè a la testa da la cursa. Kim Le Court ed Adelheid Morath èn dentant collidadas e tuttas duas crudadas tar in tempo aut. Le Court ha pudì cuntinuar la cursa suenter in mument, Adelheid Morath ha dentant stuì bandunar la cursa ed ir a l’ospital cun ina claviglia rutta.
Profità da quest accident ha l’equipa Torpado | Bulls da Katazina Sosna ed Irina Lützelschwab. La Lituana e la Svizra gudognan la «queen stage» ed èn da nov er sin plaz 2 da la classificaziun generala.
Elysator Efficient Infinity Insure è vinavant sin plaz in, quai cun ina reserva da 35 minutas, sche Kim Le Court è buna dad ir a la partenza damaun suenter sia crudada n'è dentant betg anc cler, ella è arrivada en l'arrivada cun dolurs e n'ha betg prendì part a l'undrientscha dals victurs dal di.
Damaun, sonda, spetga lura anc la 5avla ed ultima etappa dal Swiss Epic 2023, quai sur 66 kilometers sin ils trails enturn Tavau.
