La dischillusiun a la fin da l’ultima stagiun era gronda tar l'EHC San Murezzan. Per la segunda giada en fila aveva San Murezzan mussà ina buna qualificaziun, en ils playoffs è l’equipa lura dentant crudada or da la decisiun gia en l'otgavelfinal. Gia il principi da favrer era la stagiun per l'EHC San Murezzan a fin. L’equipa da l’Engiadina'Ota ha analisà la stagiun passada e lura prendì las mesiras necessarias per ch'i gartegia questa stagiun cun il quartfinal. L’equipa dal trenader Alexander Aufderklamm vul puspè avanzar en la segunda runda dals playoffs. Quai è la finamira.
Integrar giuvens giugaders pli bain pussibel
La sfida per las equipas da hockey engiadinaisas è mintga primavaira e stad la medema. Empruvar d'integrar agens giuvens giugaders pli bain pussaivel en l’equipa. En vista a la nova stagiun ha l'EHC San Murezzan nominà intgins agens juniors da far part al champiunadi cun l’emprima equipa. Ils giuvens duajan s’integrar pli bain pussibel en l’equipa. Cler che quels na vegnan anc da remplazzar anteriurs giugaders rutinads, dentant duajan els vegnir manads sin il livel da l’emprima equipa.
Suenter dus otgavelfinals duai puspè gartegiar cun il quartfinal
Vai tenor il schef da sport da l'EHC San Murezzan, Marc Wolf, lura duai l'EHC San Murezzan terminar la qualificaziun sin las emprimas quatter plazzas. Quai muntass che San Murezzan avess lura en las serias da playoff adina avantatg da chasa. Suenter che l’equipa è sgulada ils davos dus onns gia en ils otgavelfinals or da la decisiun aviseschan els per questa stagiun ils quartfinals. Vul dir che l'EHC San Murezzan duai anc vegnir ina runda pli lunsch che las davosas stagiuns.
