En ina seria da playoff che dura maximalmain trais partidas na pon ins sa lubir nagins sbagls. Sco equipa n'han ins nagina peda da curreger insatge. Exact quai è capità er al EHC San Murezzan. L’equipa da l’Engiadin'Ota ha pers l’emprim gieu da la seria dad otgavelfinal cunter Ascona e vuleva curreger quest sbagl a chasa. Quai dentant senza success. San Murezzan è bain ì cunter Ascona en avantatg. L’equipa tessinaisa ha dentant egualisà e suenter perfin stort il gieu. San Murezzan n'è betg pli stà bun da reagir.
Dapi sis stagiuns spetga San Murezzan sin in success en l'otgavelfinal
Ils ultims onns è il EHC San Murezzan adina gia crudà en l’emprima runda dals playoffs or da la decisiun. La davosa giada aveva l’equipa da l’Engiadin'Ota fatg durant la stagiun 2017/2018 il pass en ils quartfinals. Dapi lura spetga San Murezzan sin in tal success e l’equipa spetga vinavant. Tuttina èn ins cuntent tar il EHC San Murezzan cun la stagiun. Durant l’entir enviern ha l’equipa stuì cumbatter cun feridas da giugaders, quasi mai n'era l’equipa cumpletta. Ils trenaders eran perquai sfurzads da prender suenter juniors. E quels han fatg lur lavur fitg bain. Era sche la fin da la stagiun fa mal, cun in zichel distanza pon ins guardar enavos en Engiadin'Ota sin ina buna stagiun.
Ulteriuras partidas
En l'ulteriur duel d'otgavelfinal ha Lai Valbella stuì suttacumber a l'EV Zug cun 0 ad 1. Cunquai ch'il club grischun ha però gudagnà l'emprima partida dals Best of Three n'è la decisiun anc betg crudada. La partida decisiva è gievgia proxima.
En 1. liga ha il HC Partenz Singuradi gudagnà ses emprim gieu da la seria da quartfinal encunter ils Red Lions Reinach cun 3 a 2.