Derbi sursilvan - Trun/Rabius vs. Schluein Glion – David cunter Goliat?

Derby sursilvan – live tar RTR

Avrir la box Serrar la box

Dumengia, ils 7 d'avrigl, a partir da las 14:45 emetta RTR il gieu tranter l'US Schluein/Glion e CB Trun/Rabius via livestream qua sin www.rtr.ch .

Il gieu che ha lieu a Trun vegn commentà da noss reporter da sport Ursin Lechmann.

Grond support dals fans

Senza dubi: L'US Schluein Glion ed il CB Turn/Rabius èn ils dus clubs cun ils pli blers aspectaturs en Surselva. A Pustget (Trun) sco a Crap Gries (Schluein) vegn dumbrà savens sur 200 aspectaturs ed aspectaturas tar ils gieus. En ils duels directs sa radunan fin 500 fans e varga sper il plaz da ballape.

Entant ch'ils da Trun/Rabius han lur renumada «curva kiosk» na datti a Schluein betg in tal chantun sin lur tribuna, nua che propi ils fans impulsivs sesan. Sa chapescha ch'era l'USSI ha da lezs. Perfin in novum: Schluein Glion è probabel il sulet club da l’entir Grischun ch'ha «ultras» – pia fans che fan canera durant l’entir gieu cun chant/parolas, schumbers e bandieras. Spezialmain giuvenils sa participeschan a questa gruppaziun.

L'istorgia dals clubs

La tradiziun da ballape è gronda tant en la Cadi sco er en la Foppa. Il CB Trun/Rabius è dentant anc in zic pli vegl che l'US Schluein Glion.

CB Trun/Rabius:

• 1934: Fundaziun dal «Club de sport Trun». Il scolast e confundatur Serafin Bundi era vegnì tschernì sco emprim president.
• 1991: Il CB Trun fusiunescha cun il vischin da la US Rabius.

Avant exact 90 onns è il CB Trun/Rabius vegnì fundà: Bun 20 umens eran lura s'inscuntrads en l'hotel Tödi cun l'intent da fundar in'uniun per pratitgar differents sports, tranter auter er ballape. Ils iniziants eran oravant tut lavurers da la Fabrica da Ponn a Trun, per gronda part oriunds da la Bassa. Lur idea chatta sustegn tar indigens ed il «Club de sport Trun» è naschì. Dapi la stagiun da ballape 1991/1992 dat la squadra sut il num CB Trun/Rabius.

US Schluein Glion:

• 1942: L'US Schluein è vegnida fundada.
• 2002: L'US Schluein fusiunescha cun il CB Glion. Dapi lura è ella la pli gronda uniun da sport da la Surselva cun passa 500 commembers activs e 200 junioras e juniors.

Fundà è il club vegnì a Schluein d'intgins giuvens. Els han pudì persvader da quel temp ils responsabels da la vischnanca da metter a disposiziun in pitschen toc terren en il Guaud d'ogna en la Val da Schluein. Cun grondas stentas è il terren vegnì gulivà. In crap marcant – il «Crap Gries» – che sa chatta gist sper il plaz da ballape ha dà il num al plaz ed è stà il simbol per la veglia da tegnair la dira.

Dapi la fusiun cun Glion vegn dà ballape sut il num US Schluein-Glion.

Ils trenaders

Il CB Trun/Rabius ha dapi la stad in nov scheftrenader d'equipa, Claudio Bundi da Glion. Il trenader da la Foppa trenescha per l’emprima giada in’equipa da persunas creschidas. Avant ha el trenà blers onns equipas da juniors dal Team Surselva. Là ha el festivà blers success cun equipas da juniors A e B. Sustegnì vegn Claudio Bundi actualmain da Sandro Orlik, il chapitani, ch’è gia dapi pli lung temp blessà.

Era dapi il cumenzament da questa stagiun è Patric Casutt il nov scheftrenader da l'US Schluein Glion. Insumma è il num Casutt connectà fermamain cun il club, e quai dapi onns. Gia ses frar Urs Casutt ha trenà il club, quai ils onns 2009 fin 2015. En quest temp ha el manà l'USSI en la 2. liga regiunala. Dentant è el schef da sport da l'US Schluein Glion. Ed il terz frar, Roland Casutt, è in dals actual trenaders-assistents da l'equipa.

Sch’ins cumpareglia ils dus clubs è l'US Schluein Glion pli professiunala quai che pertutga las structuras dals trenaders. Els han per exempel in trenader fix da goli cun Damian Arpagaus. Insatge ch’il CB Trun/Rabius n’ha actualmain betg.

Stadion / plazza

Las duas plazzas da ballape na pon ins strusch cumparegliar. A Schluein è vegnì bajegià il 2014 l’Arena Crap Gries: Ina tribuna da laina cun 700 plazzas da seser, ina grond’ustaria e gardarobas sut tribuna . Senza dubi è l’Arena Crap Gries dapi sia construcziun il «mekka» dal ballape en Surselva.

A Trun/Rabius na datti nagina tribuna . Tut para in pau pli vegl che a Schluein quai che pertutga l’infrastructura dal plaz da ballape. Ma il spezial e fascinant: Sco aspectatur u aspectatura èn ins gist sper il plaz da ballape. E cuntrari a Schluein sa repartan ils fans a Trun enturn l’entira plazza e betg mo dad ina vart. Betg per nagut vegn la plazza da ballape a Pustget er magari numnà il «Hexenkessel» da la Surselva.

Las finanzas

L'US Schluein Glion dovra bunamain in quart da las entradas per il mantegniment da l’infrastructura. Trun n'ha tenor il club percunter betg investiziuns pli grondas. Tar omadus clubs na vegnan ils giugaders betg pajads per dar ballape. Quai è tar auters clubs da la terza liga savens il cas.

Squadras rumantschas

Omaduas equipas vegnan dominads da giugaders rumantschs. Tar l’equipa da Trun/Rabius è quasi mintga giugader da la Cadi u conturn. Uschia vegn per gronda part discurrì rumantsch sin il plaz. Sulettamain Geo Cauzza deriva dal Tessin e dat cun Trun/Rabius cunquai ch’el enconuscha bain in giugader da l’equipa.

Tar la US Schluein Glion èsi sper il rumantsch era il tudestg. Cunquai che divers giugaders, sco ils frars Zala da Domat, discurran be tudestg.

Giugaders en il fauss lieu?

Spezial: Tar la US Schluein Glion dattan actualmain trais giugaders da la Cadi ballape – numnadamain Rafael Deplazes, Serafin Bundi e Remy Manetsch, tuts da Mustér. Vitiers Carlo Bearth, oriund da Rabius, ch'è giugader e trenader-assistent tar l'USSI. El manca da preschent a l'equipa, cunquai ch'el è per motivs da professiun en ils Stadis Unids.

Cun Remo Alig da Ruschein dat per encunter er in giugader da la Foppa gia dapi plirs onns ballape tar Trun/Rabius.

Or da l'achiv:

Il davos derbi sursilvan en la terza liga è stà l'october, en la runda d'atun. Lura cun avantatg da chasa per il club da la Foppa. Il CB Trun/Rabius n'ha lezza giada chattà nagin recept cunter ils da Schluein Glion, ch'han surtut dominà e persvadì en l'emprima mesadad e la finala triumfà e decidì il derby cun 3:0.