Mintgatant vul quai ina idea in zichel sturna per chattar a la fin ina nova passiun. Exact quai e capità a Curdin Caspescha da Strada en Engiadina Bassa. Il falegnam da 45 onns seseva ina saira cun amis enturn la maisa radunda. En il decurs da la saira han ils amis cumenzà da discutar tge pomai ch’i dovra per far ina giada in ultra maraton.
Curdin Caspescha aveva gia dapi in tschert temp la cursa extrema dal K78 dal Swiss Alpine Marton a Tavau en mira. Quai è la cursa roiala che maina curriduras e curridurs sur la chamona Kesch ed il pass da Scaletta enturn Tavau. Ils amis han fatg la pretaisa ch'i na saja betg pussaivel da far ina tala cursa senza trenament da plirs onns. Curdin Caspescha ha ditg: «Quai n'è nagin problem. Jau dovr sulettamain in mez onn trenament per far questa cursa.» Suenter in mez onn era el a la partenza dal Swiss Alpine Maraton ed ha terminà quella cursa.
Suenter in mez onn a la partenza dal Swiss Alpin
Suenter che Curdin Caspescha ha fatg cun 37 onns ses emprim ultra maraton era mess tar el il fieu da far anc ulteriuras cursas. Gist suenter la cursa a Tavau è el s'annunzià per la cursa dal Jungfraumarathon ad Interlaken. Er quella cursa ha el pudì far. Lura è vegnì il giavisch da far er ina giada in maraton en ina citad e da cumbinar uschia l’interess vi dad in auter pajais e vi dad ina citad ch’el n'enconuscheva anc betg. L’emprim viadi ha purtà el a Tokio, lura ha el fatg il maraton da la Citad da Cap, da Londra e da Chicago ed uss spetga il maraton da New York City. Er en la metropola dals Stadis Unids cumbinescha Curdin Caspescha il plaschair vi dal currer cun ir a guardar ina nova citad.
Stuì emprender da trenar e co sa preparar sin in maraton
Sco mat ha il falegnam da Strada gia fatg bler passlung ed era giugà ballape. Currer la distanza da 42 kilometers è dentant insatge tut auter. Uschia ha el stuì emprender co ch'ins sa prepara sin ina tala cursa. Suenter quatter maratons en differentas citads ed era suenter inqual ultra maraton sa el co che quai funcziuna. Sia proxima finamira è uss l’entschatta da november da far ils 42 kilometers dal New York City Marathon.
