Cuppa grischuna - Uss èn ils duels en ils mezfinals enconuschents

En il mezfinal da la Cuppa grischuna vegni al duel sursilvan tranter il CB Trun/Rabius – che dat en la terza liga – ed il CB Lumnezia che dat en la quarta liga. Ils Lumnezians avevan procurà en il quartfinal per ina surpraisa cun gudagnar encunter Valposchiavo Calcio da la 2. liga regiunala.

En il segund mezfinal stat cun l'US Schluein Glion in’ulteriura equipa sursilvana – e l’equipa da la Foppa frunta sin Landquart. Omaduas equipas dattan en la terza liga. Ils dus mezfinals han lieu fin mars. Il final da la Cuppa grischuna è lura d’Ascensiun, la fin da matg.

Lumnezia batta surprendentamain Valposchiavo Calcio

Sco ultima squadra han ils Lumnezians segirà ina plazza en il mezfinal da la Cuppa grischuna. A chasa han els gudagnà encunter Valposchiavo Calcio cun 1:0. Il sulet gol en questa partida stretga ha il CB Lumnezia sajetà en l'emprima mesadad. Pascal Marc Derungs ha cun in penalti surmuntà il goli Mattia Marocco e procurà per la victoria da surpraisa.

Cun questa victoria va ina stagiun d'atun excellenta a fin per il CB Lumnezia. En il campiunadi da 4. liga èn els da chattar a la testa da la tabella cun otg victorias ord nov gieus. Ed en la Cuppa grischuna san ils Lumnezians, grazia a questa victoria, far speronzas da gudagnar il titel.

Trais equipas sursilvanas en il mezfinal

Cun il CB Lumnezia (4. liga), l'US Schluein Glion (3. liga) ed il CB Trun/Rabius (3. liga) èn gist trais equipas da la Surselva en il mezfinal da la Cuppa grischuna. Trun/Rabius sco er Schluein Glion han dà lur quartfinals gia avant pliras emnas. La USSI aveva gudagnà encunter Panaduz cun 3:2 ed il CB T/R aveva dumagnà Moesano Calcio suenter ina lutga da penaltis. Cumplettà vegnan ils mezfinals da Landquart che ha battì en ses quartfinal il defensur dal titel Cuira 97 cun 4:3.

Ils mezfinals han lieu il mars che vegn. Tgi che frunta sin tgi n'è anc betg enconuschent. Il final è lura d'Ascensiun, ils 29 da matg 2025.