Cun in festival da gols ha il CB Sedrun/Mustér dà adia al campiunadi da ballape regiunal. A chasa ha l’equipa gist battì l’US Danis-Tavanasa cun 7:1. Quel gieu dals 6 da zercladur è stà il davos saut en la 5avla liga da ballape. Suenter quai gieu hai dà bleras emoziuns a Sedrun ed era intginas larmas.
I fa bain mal il cor, ma nus savevan che quel mument vegnia baud u tard.
Pervia da mancanza da giugaders ha il club stuì schliar sia equipa activa da la 5avla liga. Dals 18 giugaders han 7 terminà lur carriera da ballape la fin da la stagiun – e cun be 11 giugaders n’èsi betg pli pussibel da dar campiunadi.
Per quels 11 che restan, ha il club mirà per ina schliaziun. Trais giugaders pon dar en l’avegnir cun ils juniors A dal Team Surselva ed ils ulteriurs 8 giugaders dattan la proxima stagiun cun l’US Danis-Tavanasa, er en la 5avla liga. In u l’auter dad els survegn forsa la schanza da dar cun il CB Trun/Rabius en la terza liga.
En sasez èsi strusch da crair ch’ina regiun sco Sedrun e Mustér na vegn betg da metter ensemen in’equipa d'umens.
L'uniun resta
Anc en vita resta il Club da ballape Sedrun/Mustér, quai cunzunt era per dar la pussaivladad als juniors da dar ballape en la regiun. Quai saja immens impurtant, di il president Franco Curschellas. Il CB Sedrun/Mustér dumbra numnadamain bun 50 juniors, uschè blers sco nagin auter club en Surselva cun excepziun da l’US Schluein Glion.