Quest gieu da la 2. liga regiunala è stà la davosa schanza per Valposchiavo Calcio, da mitschar da la relegaziun en la 3. liga. E la finala han ils Puschlavins battì a chasa en l'ultim gieu da la stagiun l'adversari direct Brühl Son Gagl cun 2:1. Uschia ha Valposchiavo Calcio in punct dapli che l'equipa dal Son Gagl, e na sto betg gia turnar engiu suenter sulettamain in onn.
Suenter che l'emprima mesadad è restada senza gols, han ils Son Gagliais sajettà en la 54avla minuta il 0:1. Mo 11 minutas pli tard han ils Puschlavins dentant pudì egualisar tras Alekos Zugnoni. E malgrà ina carta cotschna e mo pli cun diesch umens sin il plaz, èsi gartegià als indigens da marcar il gol decisiv a la victoria da 2:1 en la 87avla minuta. Il grond erox è stà Emanuele Oberti.
En il segund gieu da la dumengia en la 2. liga regiunala cun clubs grischuns, ha Domat pers ordaifer cunter Wittenbach cun 1:3. En quest gieu n'èsi dentant ì per nagut pli.
Ina victoria per Cuira 97
Cuira 97 ha dà la sonda ad Uster, ed è turnà cun trais puncts. Grazia ad in gol da Dario Stöber ed in autogol dad Uster, è Cuira stà ditg cun dus gols en avantatg. En la 74avla minuta ha Uster lura anc fatg in gol, il resultat è dentant restà tar il 2:1 en favur da Cuira 97. Il club grischun è cun 44 puncts sin rang 6 da la tabella en la segunda liga interregiunala.
En la terza liga ha Trun/Rabius gudagnà la sonda ordaifer cunter la segunda equipa da Cuira gist cun 7:3. Questa victoria cunter il quart da la tabella è segiramain stà balsam per l'olma dals Sursilvans, che termineschan il campiunadi cun 25 puncts sin plaz 10 da la tabella.
Medemamain en la terza liga ha l'US Schluein Glion gudagnà gievgia saira ses davos gieu da la stagiun. Cun la victoria a chasa da 3:1 cunter Bogn Ragaz surpassan ils Sursilvans gist anc il club son gagliais en la tabella, e termineschan la stagiun sin plaz dus.
