2. liga regiunala
I para sco sche Valposchiavo Calcio vegn envers la fin da la stagiun in zic ord flad. Ordaifer encunter Winkeln han ils Puschlavins pers cun 1:2. I è stà la quarta terrada en roda. Uschia èn els da nov sin plazza 12 ed uschia sut il stritg.
Proxima fin d'emna stat il davos gieu da campiunadi sin il program ed i vegn là tar il duel che decida sche Valposchiavo Calcio resta en 2. liga u betg. A chasa fruntan els sin igl SC Brühl ch'è sin plazza 11 e dus puncts avant ils Grischuns. Ils Puschlavins drovan uschia ina victoria per mitschar da la relegaziun.
3. liga
Ina impurtanta victoria ha il CB Trun/Rabius festivà a chasa encunter Triesenberg. Gist cun 5:2 han els gudagnà encunter l'equipa dal Liechtentein. Sch'ins guarda sin la tabella vesins che l'equipa da la Cadi, è da principi gia mitschada da la relegaziun. L'avantatg sin il stritg è 10 puncts. Ord motivs da restructuraziun da las ligas poi dentant er esser ch'il terz davos da la tabella vegn relegà. La federaziun da ballape da la svizra orientala ha dentant fin oz betg communitgà cleramain co i guarda ora exact.
Era la segunda equipa sursilvana en 3. liga ha festivà ina victoria questa fin d'emna. Schluein Glion ha mussà lur buna furma e gudagnà cun 6:0 encunter Sargans. Avant in'emna fin aveva l'equipa da la Foppa gia declassà Triesenberg cun 6:1.
Suenter 21 partidas è la USSI uschia sin plazza 3 da la tabella. En il davos gieu da la stagiun proxima gievgia encunter Bogn Ragaz ha Schluein Glion anc la pussaivladad da vargar l'adversari e finir la stagiun sin plazza 2. Per quai drovan els ina victoria.
2. liga interregiunala
A chasa ha Cuira 97 fatg in pari encunter il FC Frauenfeld. En la tabella da la 2. liga interregiunala è Cuira 97 ussa sin plaz 8 – e Frauenfeld sin plaz 2. En l'8avla minuta ha Frauenfeld pudì ir en avantatg cun gol dad Elvis Musaj. Pir curt avant la fin (86avla minuta) ha Fabio Barroso Alves pudì egualisar al 1:1 – ch'è restà il resultat final.