Fin uss n'ha la Svizra betg gì atletas ed atlets sin livel mundial en las disciplinas heptatlon e decatlon. Quai han la Grischuna Annik Kälin e l'Appenzellais Simon Ehammer midà questa stad: Kälin cun sia medaglia da bronz ed Ehammer cun sia medaglia d'argient al campiunadi europeic.
Annik Kälin è da meeting a meeting vegnida pli ferma ed ha suenter ses nov record svizzer al campiunadi mundial anc ina giada meglierà quel al campiunadi europeic (total 6515 puncts).
Ina medaglia che lascha emblidar l'onn 2021
Quai che Annik Kälin ha cuntanschì en questa stagiun è impressiunant. Tant pli sch'ins guarda enavos sin l'onn 2021, cura ch'ella ha stuì far sfurzadamain pausa pervia da problems cun il dies. Er il siemi olimpic ha ella lura stuì sutterrar. Il success en questa stagiun, cun sa catapultar en il ravugl da las meglras heptatletas dal mund, saja insanua er la conferma d'avair fatg tut endretg cun trair il frain d'urgenza avant in onn e mez e dar temp per stabilisar ses dies.
Premiera a la Weltklasse Zürich
Suenter sia premiera sin la tribuna mundiala ed europeica datti a la fin da sia stagiun da siemi anc ina premiera. Al meeting a Turitg che far part a la pli impurtanta seria d'atletica leva, la Diamond League, dastga Annik Kälin parter en sia disciplina da parada, il siglir lung.
Cun 6,73 meters al campiunadi europeic è ella siglida uschè lunsch sco anc mai. En la concurrenza da las spezialistas be dal siglir lung fiss quai stà il 5avel plaz a Minca. La giuvna da Grüsch vul cun questa lunghezza e forsa perfin anc cun in per centimeters pli lunsch engraziar per quella schanza e quella wildcard a la Weltklasse Zürich. Pudair ir là a la partenza, er quai saja in siemi, di la giuvna da 22 onns da Grüsch.
