Annik Kälin po festivar il pli grond success en sia anc giuvna carriera. L'atleta da Grüsch da 22 onns ha gudagnà al campiunadi europeic d'atletica leva a Minca la medaglia da bronz en il heptatlon. En la davosa disciplina, la cursa dad 800 meters, è Kälin currida uschè svelt sco anc mai en sia carriera. Cun total 6'515 puncts ha ella er gist realisà in nov record svizzer en il heptatlon. Per il segund plaz e la medaglia d'argient han la finala be mancà 17 puncts. Campiunessa europeica è vegnida la gronda favurita Nafissatou Thiam da la Belgia ed argient ha gudagnà la Polaca Adrianna Sulek.
Scherrer, Bonvin e Alberto en il Final
Julien Bonvin è currì ses meglier temp sur 400 meters cursa d'obstachels: 49,1 secundas. Cun quest temp è el en il final. Tar las dunnas èn Yasmin Giger ed Annina Fahr stadas memia plaunas per il final.
Dominik Alberto è siglì 5,65 meters cun l'asta, ed è era en il final. Chiara Scherrer è sa qualifitgada per il final sur 3'000 meters steeple. Il final è sonda a las 22:13.
