La segunda stagiun è adina la pli greva. Igl è la stagiun da conferma. Quai vala savens en il sport, ed era per Fabrizio Cavegn (22) che dat sia segunda stagiun sco profi tar Vaduz.
- En sia emprima stagiun en la Challenge League ha el dà 36 gieus da campiunadi per Vaduz, e sajettà 12 gols e dà 3 assists. El è stà il capo-tiragols da l'equipa dal Liechtenstein.
Tar il Lumnezian n'han ins betg vis ina sminuziun da la prestaziun en sia segunda stagiun. Bain ha el gì fasas cun plirs gieus senza gols. Ma tut en tut han las prestaziuns constà.
- Er questa stagiun è el il giugader che ha fin qua sajettà ils pli blers gols tar Vaduz. 10 giadas ha el tutgà la rait en ils emprims 31 gieus da campiunadi. Vitiers vegnan 5 assists.
Per in attatgader èn statisticas adina impurtantas. La fin finala vegnan ils attatgaders il pli savens mesirads vi dals gols ed assists. Quai sa er il giugader da Vella. Squitsch n'haja el betg sentì dapli en ses segund onn a Vaduz, u ch'i vegnia spetgà dapli dad el. Gliez na saja dentant en general betg in gronda tema tar il FC Vaduz. Qua possians ins dar ballape a moda fitg libra.
Cler mett'ins sasez magari in zic sut squitsch sch'i na funcziuna betg sco giavischà. Ma nà dal trenader u dal club na sent jau mai in squitsch.
Cun sias prestaziuns è el dentant er en ils blocs da notizias da clubs che dattan pli aut ch'en la Challenge League. Tenor la pagina d'internet «Transfermarkt.de» ha il giugader da 22 onns actualmain ina valita da 500'000 euros. Betg in auter giugader tar Vaduz ha in'uschè auta valita. «Jau ditg adina, quai è x-ina cifra». Cler, quai vegn valità da las medias u da la liga e dat in zic ina survista davart ils giugaders. Dentant sch'i giaja per in transfer, na saja quai betg la cifra decisiva, manegia el. Tuttina èsi in'indizi che mussa che Fabrizio Cavegn ha pass per pass fatg sia via ils ultims onns.
In sguard davos las culissas
L'onn passà ha RTR accumpagnà Fabrizio Cavegn sur pliras emnas. La fin finala hai dà in film/seria sur dal actualmain unic profi da ballape rumantsch.
Perspectivas da futur e contacts cun auters clubs
Vaduz è actualmain il dachasa da Fabrizio Cavegn. El sesenta bain en il Principadi da Liechtenstein nua ch'el ha anc in contract fin la stad 2026. Ma il Lumnezian conceda era ch'el haja pli grondas finamiras. Munta pia dar en ligas pli autas, forsa er en l'exteriur. «Mes giavisch fiss da dar en trais onns en la Bundesliga tudestga». Savend che quai na sa chapescha betg da sasez. Las ambiziuns sajan dentant adina grondas tar el.
Sin la dumonda, sch'el è gia en contact cun auters clubs, raquinta l'attatgader da 22 onns ch'el ha actualmain naginas offertas concretas. El vul sa concentrar sin ina buna finiziun da la stagiun cun Vaduz, che sa chatta en il mez da la tabella da la Challenge League. Ina finamira saja anc da gudagnar la Cuppa dal Liechtenstein. Tge che la stad porta? «Sch'i dat novas, lu vegnins a vegnir sisura quai».