Il venderdi las 18:30 ha la tractanda d'elecziun cumenzà per las delegadas ed ils delegads da Swiss Olympic. A las 19:30 èsi lura stà cler suenter il prim scrutini che l'anteriura cussegliera federala fa la cursa. Cun in cunter dus terz da las vuschs per Metzler-Arnold è il verdict stà clèr. Tant pli è il candidat grischun trumpà.
[...] Gea, jau sun trumpà. I n'è betg stà dal tut ina surpraisa en l'ultima fasa ch'i vegn ora uschia, ma sch'ins candidescha, less'ins vegnir elegì [...]
Las uras avant han la candidata ed il candidat salidà e tschertgà contacts dretg e sanester.
Durant plirs mais han Markus Wolf e Ruth Metzler-Arnold fatg in cumbat electoral per la successiun da Jürg Stahl en il pli aut uffizi dal sport svizzer. Els èn ids da hearing tar hearing, crusch e travers tras la Svizra. Quai cun preschentar lur fermezzas e lur ideas a las uniuns, federaziuns ed organisaziuns da sport. L'elecziun tras il parlament da sport ha era il caracter da signal, è ina sort mussavia en tge direcziun ch'i duai ir cun il sport en noss pajais.
Derivanza e posiziuns cumplet differentas
Markus Wolf viva cun sia famiglia a Cuira. El ha dà unihoc en la pli auta liga svizra, è stà trenader da la naziunala d'unihoc. Ha lavurà sco directur da sport e CEO da Swiss Ski. Ils ultims onns, fin la fin dal 2023, è el stà CEO tar las pendicularas da l'Arena Alva a Laax. In candidat ch'ha fatg e vis bler en il mund da sport. Da sias experientschas e sia enorma savida duai il sport profitar, è stà l'idea. Gugent avess el purtà quest satgados en la posiziun da president da Swiss Olympic ch'è l'uniun tetgala dal sport svizzer dal comité olimpic naziunal. Sport è sia pissiun, di Markus Wolf. El era motivà da muventar cura ch'i va per la finanziaziun dal sport, temas strategics u era la posiziun dal sport. Swiss Olympic avess tenor el stuì vegnir pli effizient.
Sia persvasiun era ch'i dovria per las sfidas futuras ina persuna dal sport a la testa e betg ina politicra.Bain savend ch'i na vegnia betg simpel encunter l'anteriura cussegliera federala Ruth Metzler-Arnold. Era sche quella è stada ina sort «noviza» sin la gronda tribuna dal sport. Ella è ina tacticra che sa co trair ils fils e che ha ina gronda rait da contacts schebain politics sco era en l'economia - quai para la finala d'avair persvadì daplirs delegads e delegadas che la stretga, lunga e directa colliaziun cun il sport da Markus Wolf.
