L'anteriur directur da l'interpresa Arena Alva Markus Wolf vul daventar president da Swiss Olympic. Il Grischun da 50 onns fa uschia concurrenza a l'anteriura cussegliera federala Ruth Metzler-Arnold. La candidatura da Markus Wolf vegn da Swiss Ski. Sustegn ha el vitiers da Swiss Cycling, Swiss Unihockey e Swiss Hockey.
Markus Wolf è stà da 2002 fin 2009 manader da la promoziun dal sport dal Grischun, da 2009 fin 2013 schef dal program da Giuventetgna e sport sco er en la direcziun da l'Uffizi federal da sport. Ils onns 2013 e 2014 è el stà directur da sport e da 2014 fin 2019 CEO da Swiss Ski. Lura ha el manà enfin la fin da l'onn passà l'Arena Alva.
Il parlament da sport elegia il successur u la successura dal president actual Jürg Stahl la fin da november.
