La citad da Cuira duai er ils proxims onns esser l'ospitanta dal Big Air. Il festival da freestyle ch'ha gì lieu questa fin d'emna per l'emprima giada en la chapitala grischuna, perquai dovri però ina votaziun dal pievel per in credit da 600'000 francs ad onn, sco il president da la citad Urs Marti ha ditg a RTR.
Suenter tschintg onns pudessan ils custs muntar a 300'000 francs. En l'avegnir pudess l'event forsa schizunt vegnir organisà senza grond sustegn da la citad.
30'000 aspectaturas ed aspectaturs al Big Air
L'occurrenza da Big Air a Cuira ha attratg 30'000 aspectaturas ed aspectaturs ier e stersas. Il segund di, la sonda, saja gia stà vendì ora tar la premiera da l'occurrenza. Quai han communitgà ils organisaturs. L'Obere Au sco lieu d'occurrenza per il Big Air saja sa cumprovada dal punct da vista da la citad da Cuira.
Nus essan fitg cuntents e n’avessan mai quintà cun in tal success – gist en in temp uschè difficil cun ina pandemia.
Surprendì da l'agen success
L’event saja sa splegà senza incaps e senza blessuras da num. Quai na sa chapeschia betg da sasez cun tanta glieud che fetschia festa e cun ina sigliera da 40 meters autezza.
Il final da snowboard la sonda saja stà il punct culminant sportiv cun 17’000 aspectaturs. Per ils snowbordists saja quai grondius d’astgar mussar sigls avant in tal publicum. En in territori da skis n’hajan ils sportists mai tanta glieud.
Tar ils concerts haja Sido attratg la pli blera glieud, ma era tar Jan Delay saja l’atmosfera stada sensaziunala. La gronda part dal publicum saja vegnì al Big Air per giudair l’entir pachet – tant il sport sco era la musica.
Bell’aura è super, ma favugn betg
La fina bell’aura saja era stada grondiusa per il Big Air. Il favugn chaud haja dentant fatg livar la naiv. Ma cun cuvrir la pista saja quai reussì da proteger la naiv sin la sigliera ed ins haja pudì manar atras l’entir event sco planisà, di Joachim Bodmer.
Demontar l’entir’installaziun
Uss vegnian tut ils indrizs da l'occurrenza allontanads. Sche tut giaja sco planisà, stettia il parcadi Obere Au puspè cumplainamain a disposiziun a partir da la gievgia.
