Il plaschair sin la nova stagiun 2022/23 è grond, quai han ils atlets svizzers laschà sentir a l’inscunter da medias a Tavau, onn per onn il sajet da partenza en la nova stagiun. I spetga in’emprima stagiun senza Dario Cologna ch’ha terminà la primavaira sia lunga carriera. L’anteriur leader dal cader svizzer manca ed uss ston auters trair il char sco per exempel Jonas Baumann oriund da Lon, cun 32 onns il pli vegl ed il pli rutinà en il cader svizzer.
Er ils atlets giuvens na pon betg pli sa zuppar davos Dario Cologna. Quai po dentant er esser ina nova schanza da sa mussar en la cuppa mundiala.
Midadas hai er dà dasper la loipa. Tranter auter è Guri Knotten la nova directura da las disciplinas nordicas tar Swiss Ski, vul dir la scheffa dal passlung, il biatlon, il siglir cun skis e la cumbinaziun nordica. L'anteriura passlungista norvegiaisa ha surpiglià quest post da Hippolyt Kempf.
