Avant quatter onns a Pyeongchang era Baumann vegnì 28avel en quella disciplina. Quest onn duai in meglier resultat esser pussibel, er perquai ch'il currider da 31 onns è en furma ed ha mussà enfin oz ina stupenta stagiun. Ses punct culminant saja dentant la cursa da staffetta. Cun ses collegas d’equipa vul el cumbatter là per ina medaglia. Davos la Norvegia e la Russia saja bler pussibel en il cumbat per la medaglia da bronz, uschia Baumann.
Skiatlon cun Jason Rüesch però senza Dario Cologna
Sper Jonas Baumann va anc in segund currider grischun a la partenza dal skiatlon, Jason Rüesch da Tavau. Avant quatter onns aveva el manchentà ils gieus olimpics a Pyeongchang pervia da surtrenament. Uschia vegni a Peking tar ina premiera per Jason Rüesch che vala dapi daditg sco gronda speranza svizra suenter la carriera da Dario Cologna.
Il Jauer, campiun olimpic dal skiatlon il 2014 a Sotschi, desista percunter sin la cursa sur 30 kilometers a Peking. El sa concentrescha sin la cursa da 15 kilometers en il stil classic, la cursa da staffetta e principalmain sin la cursa da 50 kilometers en il stil liber a la fin dals gieus olimpics.
Il terz currider svizzer al skiatlon è Candide Pralong. Il Vallesan era gia stà a la partenza als davos gieus olimpics il 2018 a Pyeongchang en la Corea dal Sid.