Ils 28 d'avust fin ils 8 da settember 2024 han lieu a Paris ils 17avels gieus paralimpics da stad. Els èn ils gieus olimpics per persunas cun impediments corporals e valan sco l’eveniment da sport il pli grond ed il pli impurtant. Var 4’400 sportistas e sportists da 168 delegaziuns fan part als paralimpics 2024.
La Svizra ad ils Paralimpics
27 atletas ed atlets cun in impediment èn nominadas per ir per la Svizra als paralimpics e cumbatter per medaglias. Las schanzas da turnar a chasa cun almain cun 14 medaglias – pia uschè bleras sco avant trais onns a Tokio – sajan fitg bunas. Quai manegia la scheffa da sport e suppleanta dal schef da missiun a Paris, Olivia Stoffel.
La festa d'avertura
Var 30'000 aspectaturas ed aspectaturs han pudì persequitar la ceremonia d'avertura da trais uras sin las tribunas sin la Place de la Concorde. La show cun il num «Paradoxe» dal choreograf Svedais Alexander Ekman duai far reflectar e laschar vesair chaussas or da in’autra perspectiva. Per la delegaziun svizra che è entrada sin la Place de la Concorde sco 144avla haja duvrà in pau dapli pazienzia, uschè Olivia Stoffel. Il sentiment da pudair martgar cun ils atlets e las atletas sut la banidera svizra saja stà in mument fitg emoziunal e commovent per ella.
