Entant ch’il focus è actualmain sin ils gieus olimpics 2024 a Paris che han cumenzà ils 24 da fanadur, sa prepara era la delegaziun svizra per ils paralimpics. Quels cumenzan duas emnas suenter ch'ils gieus regulars èn a fin.
Almain 14 medaglias
27 atletas ed atlets cun in impediment èn nominadas per ir per la Svizra als paralimpics e cumbatter per medaglias. Las schanzas da turnar a chasa cun almain cun 14 medaglias – pia uschè bleras sco avant trais onns a Tokio – sajan fitg bunas. Quai manegia la scheffa da sport e suppleanta dal schef da missiun a Paris, Olivia Stoffel.
Preparativas dapi passa in onn
L’Engiadinaisa lavura dapi dus onns tar Plussport, nua ch’ella è responsabla per il sport d’elita. Per la dunna da 43 onns vegnan ils paralimpics 2024 en Frantscha ad esser ina premiera. Ils ultims mais saja la fundaziun sa preparada minuziusamain ed haja organisà tut uschè bain sco pussibel. Pretensius saja per exempel er il transport dals atlets e da las atletas als gieus a Paris.
Ils meds per viagiar a Paris n’èn betg restrenschids sco a Tokio avant quatter onns sin l’aviun. Dentant datti en mintga tren da TGV be ina plazza per ina persuna en sutga cun rodas.
Tema ch’i pudess dar in’attatga terroristica durant ils gieus, n’ha Olivia Stoffel betg. Dentant guarda ella cun in tschert respect vers ils gieus a Paris.
