Gia da pitschna era Amruta Wyssmann fascinada dal raiver ed è raivida si dapertut. Ma en la halla u vid ina paraid da crap n'è ella mai ida – fin ch'ella ha gì 26 onns cura ch'ina amia dad ella ha prendì cun ella a Berna en ina halla da bouldrar. Là è ella s'inamurada en quest sport.
Sas bratsch sanester sut manca gia dapi la naschientscha. Ma quai n'è nagin obstachel per la grischuna da 32 onns. Ella sto simplamain proteger ses stumbel avant ch'ir en la paraid, e quai fa ella cun bler tape.
La pel è fitg fina là.
Amruta Wyssmann è stada l'emprima atleta da pararaiver en Svizra. Ensemen cun ses trenader Michael Bühler è ella quatter fin tschintg giadas l'emna en halla vid trenar. Sia finamira è actualmain il campiunadi europeic a Villars ch'i dat per l'emprima giadae silsuenter ils gieus paralimpics a Los Angeles il 2028. Pertge là daventa la disciplina per l'emprima giada paralimpica. Per la scena da raiver è quai ina buna nova e gida era a dar dapli attenziun a lur sport.
Tge handicaps che mintgin ha è fitg different, tgi ha in bratsch che manca u è paralisà, tgi sesa en sutga da rodas u tgi è tschorv e raiva. Tgi che guarda tiers po be esser surstà da la creativitad en las rutas. Trenar, treneschan els sco squadra ad Ostermundigen, là èn els gia enconuschents sco team e dattan era en egl:
Blers ch'èn en halla enconuschan nus e dumondan era, vi da tge rutas che nus essan londervi.
Entant raiva ella sin in livel da 6-7 sin la scala franzosa che va fin 9. Ed era sch'ella sto tschertgar autras variantas che autras persunas che n'han nagins handicaps, ha ella grond plaschair vid il sport ed era las sfidas da las singulas rutas. Ed en mintga cas sa legra ella ch'ha gugent la concurrenza, sin ils gieus paralimpics a Los Angeles.
