Nicolas Margreth - Il Rumantsch che fa svelts von Allmen e Monney

Dapi set onns è Nicolas Margreth trenader tar Swiss Ski. Avant ch'el ha avant dus onns pudì far il pass en la gruppa dals trenaders da speed da l'elita mundiala svizra è el stà quatter onns assistent da Franz Heinzer. Pia quel, ch'ha gronds merits en l'entira lavur da filar e laschar vegnir svelts talents giuvens sco il nov campiun mundial da la cursa rapida, Franjo von Allmen ed il victur da la medaglia da bronz, Alexis Monney. Ed era Margreth ha uschia accumpagnà gia divers onns ils dus rookies sin lur via impressiunanta.

La medaglia d'aur da Marco Odermatt en il Super-G haja lura prendì bler da questa pressiun. Era dals giuvens von Allmen e Monney che giajan mintgin enturn in pau auter cun il squitsch e cun l'entir process da sa focussar sin ina cursa. La devisa era da tegnair a mastrin l'entira tensiun e pressiun dad ir vi da la missiun campiunadis mundials sco sch'i fiss cursas tut normalas, cursas en la cuppa mundiala e na laschar derasar agitaziun tar ils atlets. Era sch'i na vegniva spetgà nagut auter che medaglias dals skiunzs da speed suenter ils gronds success gia l'entira stagiun.

Nicolas Margreth è impressiunà da l'entir svilup ch'è ì magari svelt tar ils giuvens Franjo von Allmen ed Alexis Monney. Era lur esser dasper pista, sco carstgauns, adina modests cun ina buna prisa da lumpazis. Ed il trenader è persvadì, malgrad lur enorm success, gia en giuvens onns, vegnian els a restar cun ils pes per terra. L'entira dinamica che regia da preschent en il team, nua che tuts sa gidan cun tuts, era quella contribueschia al success. Medaglias e success che faciliteschan era l'entira lavur da trenaders e staff. I na saja betg da star e tschertgar en l'analisa da video nua ch'ins perdia ina secunda u dapli, senza propi savair daco, raquinta Nicolas Margreth.

Il Rumantsch e ses chavels èn stads al cumenzament da las frisuras da Swiss Ski

Nicolas Margreth, che charezza ses chavels, è stà al cumenzament da l'idea da quai ch'ha bitta pulitas undas ed è vegnì titulà sco «gate da frisuras». Il trenader da cundiziun ha manegià ina saira a maisa envers il Rumantsch, sch'i gartegia cun aur en la cursa rapida, lura vegnia taglià giu ils chavels. Betg mo a Nicolas Margreth, mabain a tut ils trenaders ed atlets da speed.

Ils skiunzs han lura filà vinavant l'idea. Chau blut be sch'ils Svizzers festiveschian ina victoria dubla en la cursa roiala. E cunquai ch'igl ha dà aur e bronz, han ins decidì da be tagliar ina mesa blutta.

L'emprim che ha gì da tegnair vi ses chau e laschar tagliar ses chavels è stà Nicolas Margreth. Quel che ha taglià, era sch'el haja l'emprim gì pulit respect, è stà il campiun mundial Franjo von Allmen. I saja stà in giaudi che ha bittà grondas undas ed effectuà bleras reacziuns. Il di suenter la gronda festa cun ils victurs da medaglia hajan ins lura empruvà da reparar las creaziuns da frisuras. Dentant vesian tuts ora tuttina, raquinta Nicolas Margreth, tuts n'hajan uss nagins chavels sin il chau.