Il punct culminant da la stagiun da ski alpin stat avant porta. Als campiunadis mundials a Saalbach Hinterglemm datti en tut 11 decisiuns da medaglias. Tut las cursas vegnan fatgas al medem culm, il Zwölferkogel a Hinterglemm. Ils organisaturs han fatg in areal d'arrivada central per tut las disciplinas ch'ha plaz per 15'000 aspectaturas e fans dal sport da skis. Ils organisaturs quintan en tut cun da quai da 250'000 fans a Saalbach-Hinterglemm.
Atletas ed atlets da Swiss Ski èn en furma
Las Svizras ed ils Svizzers han enfin uss gì ina stagiun da siemi cun numerus success e plazzas da podest en la cuppa mundiala. Tant tar ils umens sco tar las dunnas hai dà victorias singulas sco er victorias dublas. La Svizra maina uschia er cleramain il classament general da las naziuns. E quest enviern da cursas fulminant leventa grondas spetgas che la delegaziun svzra turna cun inqual medaglia dals mundials en Austria.
En tut ha Swiss Ski nominà 13 umens ed 11 dunnas. Qua la survista tgi ch'ha ademplì en tge disciplinas ils criteris. Pro disciplina ha mintga naziun il dretg da laschar ir a la partenza 4 atlets u atletas. Abstrahà dal defensur dal titel, lez ha ses plaz da partenza sin segir.
Umens
- Cursa rapida: Marco Odermatt (defensur dal titel), Justin Murisier, Franjo von Allmen, Stefan Rogentin, Alexis Monney, Marco Kohler, Lars Rösti
- Super-G: Marco Odermatt, Stefan Rogentin, Alexis Monney, Franjo von Allmen, Justin Murisier
- Slalom gigant: Marco Odermatt (defensur dal titel), Loïc Meillard, Luca Aerni, Thomas Tumler
- Slalom: Loïc Meillard, Tanguy Nef, Daniel Yule, Marc Rochat
Dus skiunz grischuns
-
Bild 1 von 2Legenda: Thomas Tumler, 35 onns, da Samignun. Keystone
-
Bild 2 von 2Legenda: Stefan Rogentin, 30 onns, da Lai. Keystone
Dunnas
- Cursa rapida: Lara Gut-Behrami, Corinne Suter, Malorie Blanc
- Super-G: Lara Gut-Behrami, Corinne Suter, Michelle Gisin
- Slalom gigant: Lara Gut-Behrami, Camille Rast, Wendy Holdener
- Slalom: Camille Rast, Wendy Holdener, Mélanie Meillard, Eliane Christen
- Supplementarmain selecziunads: Priska Ming-Nufer, Aline Höpli, Delphine Darbellay
Tge atletas ed atlets che van la finala definitiv a la partenza en las singulas cursas decidan ils trenaders responsabels al lieu.
Concurrenza da team
Il quartett svizzer a la partenza sa cumpona da Thomas Tumler, Luca Aerni, Wendy Holdener e Delphine Darbellay. I cumenza cun ils 8avels finals. La Svizra che maina la rangaziun da las naziuns è direct qualificada per la runda da las ultimas 8 naziuns. En mintga runda datti 4 duels directs. Mintgamai dus tar las dunnas e dus tar ils umens. La naziun che gudogna ils blers percurs sa qualifitgescha per la proxima runda. Statti a la fin pari 2 a 2 vegn quintà ensemen ils temps da las cursas ed ils svelts èn vinavant. Defensurs dal titel da quest team event parallel èn ils Stadis unids.
A Saalbach-Hinterglemm stat l'emprima giada la disciplina «team cumbinaziun» sin il program. Là van mintgamai duas atletas a la partenza. Ina fa la cursa rapida, l'autra in slalom. Lur temps vegnan quintads ensemen e las pli sveltas gudognan las medaglias. Ed era tar ils umens datti quests duets che cumbattan per il titel e las medaglias.
