Avant passa 13 onns ha Nino Niederreiter debutà en il dress dals New York Islanders en la NHL. Durant duas stagiuns ha il Grischun pudì numnar il «Big Apple» sia patria. Sia via en la meglra liga da hockey dal mund ha manà el silsuenter sur Saint Paul (Minnesota), Raleigh (Carolina) e Nashville fin a Winnipeg. En la provinza canadaisa Manitoba è il giugader da 32 onns dapi dus onns a chasa. Fin oz ha el dà, en tut cun qualificaziun e playoffs, var 1'000 gieus en la meglra liga da hockey dal mund.
Entaifer la NHL n'ha Winnipeg betg gist la meglra reputaziun tar giugaders. La citad vala perfin sco nunattractiva, cunzunt la fradaglia. Quella po d'enviern ir giu enfin a minus 30 grads. L'attatgader da Cuira è en il fratemp sa disà vi da quai.
La citad n'è betg uschè super sexy sco forsa autras citads. Il fraid è in minus, ma i dat er avantatgs.
L'attractivitad survesaivla da Winnipeg sco citad porta dentant era ses avantatgs: «Qua s'occup'ins forsa in pau dapli dals giugadurs che tar auters clubs, perquai che la glieud dal club sa ch'i dat pli bels lieus per viver», crai Niederreiter. Ed el agiunta: «I fa grond plaschair da dar hockey a Winnipeg.»
La carriera da Nino Niederreiter
-
Bild 1 von 5. Tar ils New York Islanders ha sia carriera cumenzà. Durant duas stagiuns ed en 64 gieus ha el purtà il tricot dals Islanders. Bildquelle: Keystone.
-
Bild 2 von 5. A Minnesota èsi gartegià al Grischun da sa metter atras en la NHL. La stagiun 2016/2017 ha el sajetà 25 gols e dà 32 assists. I è stà fin oz sia pli productiva stagiun en la NHL. Bunamain sis onns ha el dà per ils Minnesota Wild e cuntanschì pliras giadas ils playoffs. Bildquelle: Keystone.
-
Bild 3 von 5. Il viadi ès ì vinvant tar ils Carolina Hurricanes. Quatter onns è l'equipa da la citad da Raleigh stà il da chasa da Nino Niederreiter. Er culs Hurricanes è el sa qualifitgà mintg'onn per ils playoffs. Per il Stanley Cup n'hai dentant mai tanschì. Bildquelle: Keystone.
-
Bild 4 von 5. Nashville è mo stà per in mez onn l'equipa da l'attatgader. Suenter 56 gieus nua ch'el ha sajetà 18 gols e dà 10 assists è el vegnì fatg il traden dals Nashville Predators tar ils Winnipeg Jets. Bildquelle: Keystone.
-
Bild 5 von 5. Dapi il favrer 2023 èn ils Winnipeg Jets l'equipa da Nino Niederreiter. Qua vul el finalmain gudagnar il Stanley Cup. Bildquelle: Keystone.
L'equipa da l'ura
Quai che augmenta actualmain il factur da plaschair è il success. Durant las emprimas duas stagiuns da Niederreiter a Winnipeg han ils Jets cuntanschì omaduas giadas ils playoffs. En l'emprima runda dals playoffs è l'aventura dentant mintgmai stada a fin.
La furma actuala da l'equipa fa dentant speranza ch'i pudess ir pli lunsch questa stagiun. Radund 20 gieus avant la fin da la qualificaziun n'ha betg in'autra equipa en la NHL tants puncts sco ils Winnipeg Jets. Nino Niederreiter sa dentant bain che la fasa decisiva cumenza pir mez avrigl cun ils playoffs. La gronda finamira saja da gudagnar il Stanley Cup. Perquai cumbatta l'attatgader da 32 onns. Ed i fiss dal reminent er l'emprim titel en l'istorgia dals Winnipeg Jets.