Nino Schurter ha mussà ina partenza solida en la stagiun olimpica 2024. En l'emprima cursa da la cuppa mundiala, il short track a Mairiporã en la Brasilia è il Lumnezian ditg stà en la gruppa da testa. La finala ha el cuntanschì l'arrivada sco 8avel cun in retard da sis secundas sin il victur, Samuel Gaze da la Nova Zelanda. Il campiun mundial en questa disciplina ha battì en il sprint final il Tudestg Luca Schwarzbauer ed il Chilen Martin Vidaurre Kossmann
Meglier svizzer è stà Thomas Litscher sco 5avel. El ha pers be duas secundas sin il victur Samuel Gaze. Filippo Colombo sco 12avel, Lars Forster sco 14avel, Mathias Flückiger sco 20avel, Joel Roth sco 21avel e Marcel Guerrini sco 28avel han tuts manchentà in plaz sut ils top 10. Vital Albin ha dà si la cursa per uschia er spargnar las forzas per la cursa roiala da cross-country.
Emprima cursa – emprim podest svizzer
Tar las dunnas ha Alessandra Keller gia procurà en l'emprima cursa da la cuppa mundiala en questa stagiun per in emprim podest svizzer. Ella è vegnida en la cursa da short track terza cun in retard da nov secundas davos la victura Evie Richards da la Gronda Bretagna. Sco segunda ha l'Australiana Rebecca Henderson cuntanschì l'arrivada.
Per in top resultat ha er Sina Frei procurà. Ella è vegnida 6avla. Linda Indergand ha terminà la cursa sco 13avla, Jolanda Neff sco 14avla, Nicole Koller sco 17avla e Steffi Häberlin sco 20avla. Gist Jolanda Neff è ditg stada en la gruppa da testa, ha sin las davosas duas rundas però pers bler temp.
La dumengia stattan sin il program las cursas roialas da cross-country a Mairiporã en la Brasilia.
RTR metta il bike en il focus. Cun livestreams, resultats e reportaschas, cun atletas ed era cun vus.