Jau n’avess mai cartì ch’jau vegn uschè lunsch cun il sport ed er ch’jau hai uschè bler cletg e success en il sport.
La tribuna vegn pli e pli gronda. Dapi questa stagiun sa participescha Chiara Solèr regularmain a cursas da mountainbike internaziunalas. L'entschatta da matg ha ella gì ad Albstadt en la Germania sia premiera en la cuppa mundiala. Be in’emna pli tard è la Lumneziana er stada a la partenza da la cuppa mundiala a Nove Mesto en Tschechia. Tar omaduas cursas, quai en il ravugl da las meglras junioras dal mund, ha Chiara Solèr manchentà be per pauc in plaz sut las top 20. Ad Albstadt era ella sin buna via, lura dentant vegnida franada d’in defect en la davosa runda.
La «EM» e la «WM» sco finamira
En quest’emprima stagiun cun las junioras vali da principalmain rimnar experientscha. Dasper la carriera da sport fa Chiara Solèr in emprendissadi mercantil tar la vischnanca Lumnezia. Quest emprendissadi fa ella en quatter enstagl trais onns per uschia avair dapli temp da trenar.
Jau na vai nagin temp liber cun lavurar, ir a scola, trenar e far cursas. Per il success fatsch jau dentant gugent quai.
L’entschatta zercladur vul Chiara Solèr cumbatter per ina medaglia al campiunadi svizzer da mountainbike a Leysin en il chantun Vad. Plinavant è la finamira da pudair sa participar quest onn al campiunadi d’Europa ed al campiunadi mundial la fin avust a Les Gets en Frantscha, il punct culminant da la stagiun da mountainbike 2022. A lunga vista siemia la Lumneziana, ch’ha frequentà la scola da talents a Glion, d’ina medaglia olimpica tar l’elita.
Trenar sut la batgetta d’Alessandra Keller
Dapi intgins mais po Chiara Solèr profitar da tips e trics d’Alessandra Keller che fa part a la medema equipa, il team da Thömus da Ralph Näf, e che tutga actualmain tar ina da las fermas mountainbikras dal mund. Keller ch’è daventada tant campiunessa mundiala tar las junioras sco er en la categoria U23 na vul dentant betg sulet esser ina trenadra, mabain er ina mentura.
Jau poss scriver ad ella in sms e curt suenter survegn jau gia ina resposta. Ella è propi adina qua per mai.
Las premissas èn pia bunas per daventar profi e far carriera. La via è dentant anc lunga. Il success tar las junioras n’è anc nagina garanzia ch’ins haja pli tard er success tar l’elita. Alessandra Keller è dentant da buna speranza che Chiara Solèr vegnia da realisar in di ses siemi e ch'ella possia sa participar ina giada a gieus olimpics, i stoppia simplamain constar tut.
