Nino Schurter ha cuntanschì l’arrivada cun in retard da 35 secundas sin il victur Titouan Carod. Il Franzos aveva gia gudagnà il venderdi la cursa da short track ed ha uschia anc pudì terminar la stagiun sin il segund plaz dal classament generà. Terz è vegnì en la davosa cursa da la stagiun il Franzos Jordan Sarrou (+1:08 min.). Il Talian Luca Braidot ch’avess anc gì las meglras cartas da batter Nino Schurter en il classament general è vegnì 5avel.
Ulteriur record per Nino Schurter
Cun gudagnar per l’otgavla giada la cuppa mundiala generala ha il mountainbiker oriund da Tersnaus er battì en questa rubrica ses anteriur rival Julien Absalon. Il Franzos ch’ha terminà sia carriera avant quatter onns era stà set giadas il pli constant mountainbiker da la stagiun.
Quai che pertutga victorias en la cuppa mundiala èn Nino Schurter e Julien Absalon vinavant sin il medem stgalim cun 33 victorias. Il Lumnezian survegn dentant la schanza da rumper quest record la proxima stagiun. Pertutgant titels da campiun mundial maina Nino Schurter cun 10:5 encunter Absalon. Il Franzos è però daventà duas giadas campiun olimpic. Persuenter ha Schurter gudagnà in entir set medaglias olimpicas, aur a Rio il 2016, argient a Londra il 2012 e Bronz a Peking il 2008.
Vital Albin sut ils top 10
Ina grondiusa prestaziun ha er Vital Albin mussà. Il mountainbiker da Tersnaus è vegnì 9avel (+2:44 min.) en la davosa cursa da la cuppa mundiala en questa stagiun. Anc avant Vital Albin è Marcel Guerrini classà sco 8avel (+2:21 min.). Ed er anc cuntanschì in plaz sut ils top 10 ha Joel Roth sco 10avel (+2:49 min.). Betg ì sco giavischà èsi perencunter a Filippo Colombo. Il Tessinais ha stuì sa cuntentar cun il 36avel plaz (+5:59 min.). Il terz grischun a la partenza, Ursin Spescha da Sevgein, ha terminà la cursa sco 104avel (+10:12 min.)
Stagiun 2022 a fin
La stagiun da la cuppa mundiala da mountainbike 2022 è a fin. Tut en tut èn stadas sin il program nov staziuns, tranter auter er Lai l'entschatta fanadur. Il punct culminant è però stà il campiunadi mundial a Les Gets en Frantscha. Er l'onn proxim spetgan nov cursas da la cuppa mundiala. Liber vai l'entschatta matg a Valkenburg en l'Ollanda. Dals 9-11 da zercladur s'inscuntran ils megliers mountainbikers dal mund lura puspè a Lai. Al cumenzament d'avust spetga lura il campiunadi mundial a Fort William en la Scozia. Ed a fin va la cuppa mundiala 2023 l'october a Mont-Sainte-Anne en il Canada.
Alessandra Keller sin l’aut da la carriera
La mountainbikera dal chantun Sutsilvania ha gudagnà il classament general da la cuppa mundiala da mountainbike cross-country ed uschia realisà il «double». Dus dis avant aveva Keller er gudagnà il classament general en la discplina short track. Keller ch'ha 26 onns è uschia suenter Barbara Blatter e Jolanda Neff la terza Svizra che gudogna la cuppa mundiala generala.
Ad Alessandra Keller ha tanschì in 6avel plaz (+5:27 minutas) en la davosa cursa da la stagiun a Val di Sole en l’Italia. Sias duas concurrentas ch’eran anc classadas avant Keller avant quest final n’han gì nagina schanza. L’Australiana Rebecca McConnell è vegnida be 19avla e l’Ollandaisa Anne Terpstra che patescha dapi intgins dis d’ina infecziun vid la salivera da l’ureglia ha stuì dar si la cursa avant la davosa runda.
Per Alessandra Keller va uschia a fin la meglra stagiun da sia carriera. Ella è stada la mountainbikera cun las prestaziuns las pli constantas. Dasper il classament general ha ella er anc gudagnà argient al campiunadi mundial a Les Gets en il short track.
Jolanda Neff sin il podest
Meglra Svizra en la davosa cursa da la stagiun è stada Jolanda Neff. La campiunessa olimpica da Tokyo è vegnida terza (+ 2:29 minutas) davos Pauline Ferrand-Prévot e Loana Lecomte. Las duas franzos ch’han gia dominà tant il campiunadi d’Europa sco er il campiunadi mundial han pudì sa distanziar gia baud da l’entira concurrenza. En la terza da tschintg rundas ha Loana Lecomte lura stuì ceder envers la campiunessa mundiala Pauline Ferrand-Prévot. La finala ha Ferrand-Prévot cuntanschì l’arrivada cun in avantatg da 1:27 minutas sin sia giuvna cumpatriota.
Ina buna prestaziun ha er mussà Sina Frei ch’è vegnida 5avla (+5:11 minutas). Plinavant è Ramona Forchini vegnida 10avla e Linda Indergand 12avla.
Dunnas U23: Ginia Caluori datiers dals top 10
En la cursa da cross-country da las dunnas U23 è Ronja Blöchlinger vegnida segunda (+0:44 min.) ed uschia stada classada en in sandwich franzos. Gudagnà ha numnadamain la campiunessa mundiala da Les Gets en quella categoria sut 23 onns, Line Burquier. Ella ha gudagnà 5 da 9 cursas da la cuppa mundiala ed uschia er il classament general avant la Svizra Noëlle Buri ch’ha terminà la davosa cursa a Val di Sole sin il 5avel plaz (+2:19 min.). Terza è vegnida la Franzosa Noemie Garnier (+1:29 min). La Grischuna Ginia Caluori da Panaduz ha pers 4:45 minutas ed è vegnida 13avla.
Umens U23: Janis Baumann manchenta ils top 20
La cursa dals umens U23 ha gudagnà il grond favurit, il Chilen Martin Vidaurre Kossmann. Suenter ch’el ha anc stuì sa cuntentar cun il quart plaz al campiunadi mundial a Les Gets ha ell triumfà al final da la cuppa mundiala cun in avantatg da 45 secundas sin il Spagnol David Domingo Campos Motos. Martin Vidaurre ha gudagnà en questa stagiun 8 da 9 cursas da la cuppa mundiala. Sulet a Vallnord (Andorra) ha el stuì sa cuntentar be cun il 8avel plaz.
Cumplettà il podest sco terz a Val di Solle ha tar ils umens sut 23 onns il Brasilian Gustavo Xavier de Oliveira (+0:50 min.). Meglier Svizzer è vegnì Luca Schätti sco 6avel (+2:17 min.). Avant bun in’emna aveva el gudagnà bronz al campiunadi mundial dals U23. Il Grischun Janis Baumann dad Igis ha terminà la stagiun da la cuppa mundiala cun in 24avel plaz (+4:11 min.).
Balanche gudogna classament general da downhill
Be in’emna suenter il malengraziaivel quart plaz al campiunadi mundial a Les Gets festivescha Camille Balanche in ulteriur grond success en sia carriera. Ella è l’emprima Svizra che gudogna il classament general en la disciplina downhill. La sportista da 32 onns dal chantun Neuchâtel ha però stuì tremblar per quest success al final da la cuppa mundiala a Val di Sole.
Avess la davosa concurrenta, la campiunessa mundiala Valentina Höll, numnadamain gudagnà la cursa en il Trentino avess l’Austriaca er gudagnà il classament general. Valentina Höll è dentant vegnida terza, uschia ch’il 5avel plaz da Balanche ha tanschì. Gudagnà la davosa cursa da downhill ha la Franzosa Myriam Nicole.
Camille Balanche stat meritadamain sisum il podest da quest classament general. Las emprimas sis cursas da la cuppa mundiala ha ella adina terminà sin il podest, trais da quellas ha ella gudagnà. L’entschatta avust era Camille Balanche, la campiunessa mundiala dal 2020 a Leogang, dentant cupitgada e rut l’oss-clavigl.
Tar ils umens ha Loris Vergier gudagnà la davosa cursa da downhill en questa stagiun. Il Franzos è stà passa trais secundas pli svelt che l’Austriac Andreas Kolb e l’American Dakotah Norton. Avant in’emna aveva Vergier gudagnà bronz al campiunadi mundial a Les Gets. Svizzers n’èn nagins stads classads sut ils top 30.
Keller gudogna classament general da short track
Pauline Ferrand-Prévot n'è il mument betg da franar. Suenter che la Franzosa è daventada a Les Gets tant campiunessa mundiala en il short track sco er en la cursa da cross-country ha ella er gudagnà la cursa da short track al final da la cuppa mundiala a Val di Sole. En il sprint final ha ella battì sia cumpatriota Loana Lecomte. Cumplettà il podest sco terza ha Alessandra Keller. La mountainbikera dal chantun Sutsilvania ha battì il sprint per il terz e quart plaz Jolanda Neff ch'è vegnida quarta.
Grazia a la quarta plazza da podest en questa stagiun gudogna Alessandra Keller uschia il classament general en la disciplina short track.
Nagin Svizzer sin il podest en il short track
Tar ils umens ha Nino Schurter manchentà be per pauc in ulteriur plaz da podest. El ha terminà la cursa da short track sco quart davos il Franzos Titouan Carod, il Sidafrican Alan Hatherly ed il Talian Luca Braidot. Il classament general gudogna uschia Alan Hatherly avant il Tessinais Filippo Colombo ch'ha stuì sa cuntentar cun il 15avel plaz. Vital Albin è vegnì be 37avel. Suenter ch'el ha pers il contact cun la testa ha il mountainbiker da Tersnaus dentant reducì il tempo per spargnar las forzas per la cursa roiala da cross-country da la dumengia.
