La chombra disciplinara dal sport svizzer distgargia il mountainbiker Mathias Flückiger da las renfatschas da doping. La prova d'urin dal zercladur 2022 ed ils resultats da l'analisa na sajan betg pli utilisablas, argumentescha la chombra disciplinara ed acquittescha uschia Flückiger da tut las renfatschas da doping cun Zeranol avant 2 onns.
Flückiger: «Levgià e cuntent»
Mathias Flückiger sez lascha communitgar d'esser levgià e cuntent cun la decisiun da la chombra disciplinara. Per il mument sa concentreschia el però sin sias finamiras sportivas, e na prendia betg posiziun persunalmain.
Per Swiss Sport Integrity betg plausibel
Il cas n'è però anc betg conclus definitivamain. La fundaziun cunter doping Swiss Sport Integrity n'è betg cuntenta cun la decisiun che na saja betg plausibla. Ella vul però anc spetgar l'argumentaziun en scrit, e suenter decider, schebain trair il cas avant il Tribunal da sport internaziunal.
