La suspensiun provisorica dal ciclist da mountainbike svizzer Mathias Flückiger è abolida. Il cussegl disciplinar da Swiss Olympic ha decis ch'il resultat da test atipic da Zeranol na dastga betg vegnir valità sco test positiv da doping.
Il ciclist da mountainbike Mathias Flückiger era vegnì suspendì ils 18 d'avust suenter ina prova positiva cun ina minima quantitad da Zeranol ch'el ha dà giu ils 5 da zercladur.
Flückiger surlevgià, Swiss Sport integrity betg persvas
Flückiger ha adina suttastritgà ch'el saja innocent ed ha inoltrà il settember in dossier cun explicaziuns ed indizis distgargionds. Suenter 120 dis è la suspensiun ussa vegnida abolida. Sco che Flückiger ha ditg envers SRF saja la decisiun in grond surlevtg per el, ils ultims mais sajan stads ils mais ils pli terribels da sia vita.
La Swiss Sport integrity, che ha suspendì a Flückiger questa stad, è tenor ina communicaziun anc adina da l'opiniun che la suspensiun provisorica saja stada necessaria, els vegnan ad examinar la decisiun dal cussegl disciplinar da Swiss Olympic.
