Ch’el è en furma e pront per la pli impurtanta cursa da la stagiun ha Nino Schurter mussà en questa stagiun. El ha tranter auter gudagnà la cursa da la cuppa mundiala da chasa a Lai e quella en la Val di Sole. Cun 35 victorias en la cuppa mundiala ha el quest onn er battì il record da la legenda franzosa Julien Absalon. Quai è stà la gronda finamira per il 2023. Ma uss als campiunadis mundials en la Scozia vul Nino Schurter dapli.
Preparaziun en l’Engiadina
Il Lumnezian che parta sco defensur dal titel suenter ch’el ha triumfà avant in onn a Les Gets en Frantscha ha pudì trenar e sa preparar bain sin la cursa a Glentress Forest en il sid dad Edinburgh. Schurter ha tranter auter trenà en l’autezza en la regiun dal Bernina en l’Engiadina. E ch’el sa senta er bain sin il nov percurs dals campiunadis mundials ha el demonstrà en la cursa da staffetta. Er grazia a sia prestaziun ha la Svizra numnadamain gudagnà la mesemna aur en il Team Relay.
La crème de la crème a la partenza
Per defender il titel sto però tut constar, la furma, il material, il cletg, simplamain tut, da quai è er Nino Schurter conscient. E la concurrenza è gronda questa giada. Il grond rival è il campiun olimpic Tom Pidcock. Il Brit ha gudagnà quest onn tut las cursas da mountainbike nua ch’el è stà a la partenza. Er bunas cartas vegn dà a l'Ollandais Mathieu van der Poel ch’ha gia gudagnà a Glasgow il titel en la cursa da via. Van der Poel sto dentant parter davostiers sco er il Slovac Peter Sagan. Betg emblidar dastgan ins ils Franzos enturn Jordan Sarrou, Titouan Carod u Victor Koretzky.
E sa chapeschan partan er ils ulteriurs svizzers cun grondas ambiziuns, principal Mathias Flückiger ch’ha gia gudagnà trais giadas argient a campiunadis mundials. Procurar per in exploit vulan er Lars Forster e Vital Albin. Ma il grond trumf svizzer è e resta Nino Schurter.
