A la fin dad in lung di da lutga a Tavau rei in terz. Er sche Jeremy Vollenweider n'era betg en la lutga finala, va il lutgader da Schaffusa cun la plima. Pervia che ils dus pli ferms lutgaders suenter tschintg lutgas a Tavau han lutgà pari en la lutga finala gudogna Jeremy Vollenweider. Quel aveva gudagnà sia sisavla lutga encunter Thomas Koch.
Christian Biäsch a la fin cun il cranz
Ditg ha il meglier lutgader grischun da la festa da chasa a Tavau pudì sperar sin la lutga finala. Suenter trais lutgas era Christian Biäsch anc cun in punct avantatg a la testa dal classament intermediar. En il quart duel e quai dentant vegni a l’inscunter cun Domenic Schneider. Quel duel ha Biäsch pers, ed el as ha era fatg mal vi dad in pe. Er sche Biäsch è turnà cun ina victoria en la tschintgavla lutga ha el stuì cumbatter cun in handicap. Perquai ha ins decidì che la lutga finala vegn fatga tranter Domenic Schneider e Martin Hersche. La lutga è ida a fin senza victur.
Meglier grischun Marc Jörger da Domat
Per la delegaziun grischuna tar la festa da lutga grischuna-glarunaisa a Tavau ha quai dà a la fin trais cranz. Il meglier sur l’entir di da lutga era Marc Jörger da Domat. El terminescha la lutga sin plazza dus. Cranz ha quai dà ultra da quai er per Christian Biäsch sco tschintgavel e per Josias Müller da Ziràn.
Prevista
140 lutgaders cumbattan tar la festa da lutga grischuna-glarunaisa a Tavau per la curuna. Christian Biäsch da Tavau Sertig ha durant sia lutga da chasa ina rolla dubla. Per l’ina è el part dil comité d’organisaziun, dentant er en il resgim vul il lutgader far ina buna figura.
La festa da lutga grischuna-glarunaisa è la pli impurtanta per ils lutgaders grischuns. Dapi la stagiun passada e la victoria dad Armon Orlik a Flem è il titel dal retg da lutga enavos en il Grischun. E là duai il titel er restar. Armon Orlik ha dentant stuì dar forfait be dus dis avant la lutga a Tavau. Uschia che il leader dals lutgaders grischuns na sa betg defender ses titel gudagnà avant in onn a Flem.
Tut las speranzas grischunas èn uss tar Christian Biäsch
Mesirà vi dals resultats è Christian Biäsch il segund meglier lutgader grischun. Biäsch aveva intensivà en vista a la festa da lutga federala l’onn 2022 a Pratteln ses trenament e quai as bada. Biäsch ha fatg in grond pass enavant e maina uschia suenter il forfait dad Armon Orlik la delegaziun grischuna tar la festa a Tavau.
La festa è alura er la festa organisada dal club da lutga da Biäsch, il Club da lutga da Tavau. Per il lutgader da trenta onns è la lutga uschia sia lutga da chasa. Pervia ch’el è era engaschà en l’organisaziun ha Biäsch questa giada ina rolla dubla en l’organisaziun, dentant er en il resgim.
Trais lutgaders federals èn da la partida
Sa chapescha che ils lutgaders cun cranz federal han segira er in pled en chapitel. Trais cun trais stailas sin il fegl da notas, vul dir, trais lutgaders cun cranz federal èn da la partida. Numnadamain Domenic Schneider dal chantun Turgovia, Martin Hersche dal chantun Appenzell e Fabian Kindlimann dal chantun Turitg.
