Avant in onn è Vanessa Kasper da Schlarigna crudada or dal cader da Swiss Ski. Ils resultats durant la stagiun 2023/2024 n'han betg pli cuntentà ils responsabels da la Federaziun svizra da skis. La skiunza engiadinaisa n’ha dentant betg pers il curaschi, mabain decidì da cuntinuar cun sia carriera – dentant senza team, sin basa privata.
Buns resultats en la cuppa d’Europa ed en la cuppa mundiala
La finamira è davent da l’entschatta stada da pudair ir a la partenza tar las cursas da la cuppa mundiala. La qualificaziun per ir a la partenza a Sölden tar l’emprim slalom gigant da la stagiun ha Vanessa Kasper manchentà be per pauc. Davent dal november ha ella dentant pudì ir regularmain a la partenza da cursas da la cuppa mundiala – tut senza status d'in cader.
Parallel a las cursas sin il pli aut livel ha Vanessa Kasper adina puspè fatg cursas da la cuppa d’Europa. En quella seria ha Vanessa Kasper spert pudì mussar buns resultats. Ils buns resultats han alura era cuntinuà en la cuppa mundiala. A Sestriere, en Italia, ha ella per exempel terminà il slalom gigant sin plazza 18.
Buna speranza da pudair turnar en il cader da Swiss Ski
Ils resultats en la cuppa mundiala – ma surtut era quels en la cuppa d’Europa – fan curaschi a Vanessa Kasper. En la cuppa d’Europa ha la skiunza da Schlarigna terminà il classament en la disciplina slalom gigant sin plazza 2. Grazia a quels resultats ha ella segirà ina plazza fixa tar las cursas da la cuppa mundiala. Quai, ma er ils buns resultats en la cuppa mundiala, laschan sperar Vanessa Kasper ch’ella possia puspè turnar en il cader da Swiss Ski. Suenter in onn che Vanessa Kasper ha stuì organisar quasi tut suletta, tira ella ina bilantscha positiva: Ils sforzs da tut quella lavur valan segir la paina.