Mintga seria ha ina giada ina fin. Er quella dal Club da hockey da Tavau en il campiunadi Svizzer. Anc mai ha l’equipa grischuna pers durant questa stagiun suenter sessanta minutas. Encunter Fribourg Gottéron era quai dentant uschia. Tavau ha pers encunter l’equipa che rangada sin plazza indesch da la tabella.
Ditg cun 0:2 en retard
Quasi dus terzs è il Club da hockey da Tavau currì suenter a dus gols. Pir curt avant la segunda pausa ha Julian Schmutz scursanì il gieu per il HCD. Suenter, en il terz terz ha il HCD perfin pudì egualisar la partida. Per dapli n’hai dentant betg tanschì. Curt suenter che il HCD aveva fat il pari dal 2:2 ha Friburg anc ina giada fat in gol, il gol decisiv. Per il HCD è la sconfitta encunter Friburg l’emprima suenter sessanta minutas da l’entira stagiun. Anc mai avant aveva il HCD pers in gieu dal campiunadi.
Ditg peda da s’occupar cun la sconfitta n’ha Tavau betg. Il campiunadi cuntinuescha la sonda saira cun il gieu encunter Lugano.
HCD (atgnamain) en furma, Friburg anc betg
Entant ch'il Club da hockey da Tavau sa preschenta actualmain gia en ina fitg buna furma, manca quella anc tar Friburg. L’equipa che avess per pauc gudagnà la qualificaziun la stagiun passada e ch’è lura avanzada fin en il mez final dals playoffs n’è anc insumma betg en furma: Da las emprimas set partidas ha Friburg mo gudagnà dus gieus. Tut autra la situaziun dal Club da hockey da Tavau: Il HCD è sin plazza trais cun dubel uschè blers puncts sin il conto che Friburg.
Ils ulteriurs gieus
- SC Bern – HC Lugano 7:4
- Genevra Servette – ZSC Lions 3:2
- EHC Kloten – Ambri Piotta 0:6
- SC Rapperswil-Jona Lakers – Hc Ajoie 6:3
- SC Langnau Tigers – Losanna HC 3:1
- EV Zug – EHC Bienna 3:4
Sonda saira gioga il HCD ordaifer cunter Lugano.
