Per l’emprima giada dastgà ir a la partenza a questa cursa da prestige, che Dario Cologna ha gudagnà quatter giadas, uschè savens sco nagin auter, ha quest onn era Giuliana Werro. L’Engiadinaisa da 24 onns è vegnida nominada da Swiss Ski grazia a sias bunas prestaziuns al cumenzament da la stagiun cun divers plazs da podest en il Continental Cup, l’Alpen Cup ed en cursas da la FIS. Fatg furora aveva Giuliana Werro gia al davos maraton da l’Engiadina. L’onn passà ha ella numnadamain gudagnà quest maraton da chasa ed uschia pudì prender cun ella a chasa las cornas da capricorn.
L’experientscha è quai che quinta
Enfin questa stagiun era Giuliana Werro stada be trais giadas a la partenza a cursas da la cuppa mundiala, quai mintgamai a Tavau. Cun il Tour de Ski ha ella uss pudì far in ulteriur pass enavant en sia carriera. A las emprimas trais etappas dal Tour de Ski a Toblach en l’Italia na saja però betg ì sco giavischà, ella saja stada bler memia gnervusa, uschia l’Engiadinaisa avant las duas etappas a Tavau. Per las etappas da chasa ha ella cunzunt mess il focus sin l’etappa da persecuziun sur 20 kilometers classic che maina per l’emprima giada en la Val Dischma. Per l’etappa da sprint n’haja ella naginas finamiras, quai na saja betg sia disciplina. La devisa saja simplamain da dar tut e far il meglier pussibel en il prolog. Per cuntanscher il final cun las meglras 30 stuess Werro però mussar in grond exploit.
Suenter las duas etappas da chasa a Tavau vegn Giuliana Werro a bandunar il Tour de Ski, quai è stà planisà uschia da Swiss Ski davent dal cumenzament. Il siemi saja dentant schon dad ina gia pudair terminar questa cursa da set etappas che va mintgamai a fin en la Val di Fiemme.
