Pudair purtar a chasa las cornas dal capricorn – quai era adina in siemi. L’Engiadinaisa da 23 onns ha ussa cuntanschì questa finamira.
Jau na sun betg agitada avant ina cursa, ma questa giada era jau en ina tscherta moda agitada
Il passlung è ina passiun
Tut la vita da Giuliana Werro stat sut l'ensaina dal passlung. Actualmain fa ella part al cader C da Swiss-Ski. Quest triumf al maraton dat ad ella nov schlantsch da proseguir cun il sport preferì. Dasperas fa ella in studi a distanza. Era quel ha in cler connex cun il sport, dapi bunamain dus onns studegia ella psicologia da sanadad.
Per sa recrear prenda Giuliana Werro gugent in cudesch enta maun. Ella legia gugent, e quai en lingua norvegiaisa. La Norvegia è il pajais dal passlung, e durant ils davos onns ha ella legì blera litteratura da quest pajais ed uschia emprais la lingua.
La stagiun da Giuliana Werro n’e anc betg a fin. La proxima fin d’emna han puspè lieu cursas, e lura suondan bainbaud ils campiunadis svizzers en l'Engiadina. Cun l’emprima plazza al Maraton da skis engiadinais va ella ussa cun grond schlantsch en l'avegnir.
