Encunter Straubing Tigers - Fribourg-Gottéron gudogna per l'emprima giada la Cuppa Spengler

Il turnier è stà in success

Per Marc Gianola, il president dal comité d'organisaziun, è la 96avla Cuppa Spengler stada in success. Tut ils gieus èn stads vendids ora e la glieud è stada cuntenta. Per Gianola na datti era betg grondas chaussas da midar. Cun 11 gieus en 6 dis na dettia betg bler pussaivladads da midar insatge. Uss saja da guardar enavant ed en las proximas emnas sclerir tge equipas che fan part la proxima giada.

Fribourg-Gottéron è il victur

L'equipa dal trenader Lars Leuenberger ha gia en las emprimas 10 minutas mussà tge che spetga. Quatter giadas han ils da Friburg tutgà il gol da Straubing. Brunnhuber ha en la terza minuta tutgà per ils osps da la Germania. Ma en il segund terz èsi i vinavant sco en l'emprim – Friburg tutga e Straubing na vegn betg da reagir. Era barattar il goalie n'ha la fin gidà nagut.

En il davos terz n'hai dà nagins gols pli – ils fans da Fribourg-Gottéron han dentant procurà per buna luna.

La survista da las partidas:

HCD manchenta il final

En il mezfinal dal turnier da chasa ha il club da hockey da Tavau pers cunter Fribourg-Gottéron cun 2:4. En la 56avla minuta ha Christoph Bertschy sajettà il 3:2 per Fribourg. Suenter ha il HCD prendì il goli ord il gieu, quai ch’ha lubì a De la Rose da realisar in «empty netter».

Il HCD è en il mezfinal da la Cuppa Spengler

Cun ina victoria da 4:3 cunter il club finlandais da Kärpät Oulu ha il club da hockey da Tavau cuntanschì il mezfinal da la Cuppa Spengler. Il HCD manava cun 3:0 e 4:1 ed ha il davos tuttina anc stuì tremblar. En la 48avla minuta ha Virta sajettà il davos gol da la partida.

Duas minutas avant la fin han ils Finlandais prendì il goli ord il gieu per pudair giugar sin il glatsch cun 6 cunter 5, ma quai n’ha betg manà al success giavischà.

En il mezfinal frunta il HCD sin Fribourg-Gottéron.

Straubing Tigers elimineschan Pardubice

Grazia ad ina victoria da 4:2 cunter Dynamo Pardubice ha il club da hockey da la Germania cuntanschì il mezfinal da la Cuppa Spengler.

En il mezfinal fruntan ils Straubing Tigers glindesdi sin il Team Canada. L’emprima partida avevan ils Canadais gudagnà cun 6:3.

Fribourg Gottéron direct en il mezfinal

Il club da hockey Kärpät Oulu da la Finlanda ha gudagnà la partida da la Cuppa Spengler cunter Dynamo Pardubice cun 3:2 suenter prolungaziun. Da quai ha Fribourg-Gottéron profità ch’è uschia sco victur da la gruppa qualifitgà direct per il mezfinal. Ad Oulu n’ha la victoria gidà nagut. Ils Finlandais restan davos da la gruppa.

Er il Team Canada ha cuntanschì direct il mezfinal da la Cuppa Spengler. En lur segund gieu han ils Canadais battì ils Straubing Tigers cun 6:3. Uschia han els in di supplementar pausa, entant che Straubing frunta en il quartfinal sin Pardubice.

Tavau gioga dumengia saira cunter Kärpät Oulu per la qualificaziun per il mezfinal.

Team Canada direct en il mezfinal

Suenter Fribourg-Gottéron ha er il Team Canada cuntanschì direct il mezfinal da la Cuppa Spengler. En lur segund gieu han ils Canadais battì ils Straubing Tigers cun 6:3. Uschia han els in di supplementar pausa, entant che Straubing frunta en il quartfinal sin Pardubice.

Tavau gioga cunter Kärpät Oulu per la qualificaziun per il mezfinal.

Plirs tschient fans da Straubing a Tavau

Per l’emprima giada dapi sis onns è puspè in'equipa da la Germania da la partida tar la Cuppa Spengler. Straubing represchenta quest onn las colurs da la Germania e vul far ina buna figura tar la Cuppa Spengler. L’equipa – ch’è actualmain sin plazza set da la tabella en Germania – ha gudagnà las davosas quatter partidas dal campiunadi e vegnan pia en buna furma a Tavau. En furma èn era ils fans: Cun plirs bus han els fatg il viadi da Straubing a Tavau per sustegnair lur equipa tar il turnier da tradiziun en Grischun. Blers fans stattan lura gist in pèr dis a Tavau e giaudan l’atmosfera tut speziala che regia quest dis a Tavau.

Tavau – Straubing 5:0

Suenter la terrada en l'emprim gieu ha il HCD mussà ch'i va era auter. Il gieu è sur in lung temp stà gulivà. Pir en il segund terz ha Andersson pudì sajettar l'emprim gol per Tavau. Oravant tut en il davos terz han ils Grischuns alura dà gas e gist fatg 4 gols entaifer da 9 minutas.

Friburg – Kärpät Oulu 6:4

Suenter la stgarsa terrada da l'emprim gieu ha Friburg gia stuì turnar sin il glatsch per giugar cunter Kärpät Oulu da la Finlanda. Ils “drags” da Friburg ha pudì decider per sasez il gieu plain tensiun cun 6:4.

L'equipa da la Finlanda ha gì in start optimal: be 2 minutas suenter ch'il gieu ha cumenzà han ils da la Finlanda fatg l'emprim gol. Friburg resta dentant activ ed ha grazia a Brennan pudì gulivar la 7avla. Trais giadas croda Fribourg en ina situaziun da disavantag durant l’emprim terz che va a fin cun 2:3 per Kärpät Oulu. Il segund terz po Fribourg dentant volver il gieu tar lur avantatg cun in 4:3 entaifer 7 minutas. Schegea ch’ils Finlandais fan l’ultim terz anc in qurt gol la 51avla minuta, po Friburg segirar ses avantatg durant cun dus ulteriurs gols – in da J. De la Rose ed in da J. Lilja duas minutas avant la finiziun dal gieu.

Tavau – Team Canada 2:6

Al HCD n’è la partenza en la Cuppa Spengler betg reussida tenor giavisch. Il defensur dal titel ha pers il classicher cunter il Team Canada cleramain cun 2:6. Curt avant la mesadad da la partida stevi anc pari 2:2. Silsuenter ha Canada fatg trais gols entaifer paucas minutas ed uschia procurà per la differenza.

Friburg – HC Pardubice 2:3 suenter sajettar penaltis

Gia baud ha il club da la Tschechia pudì marcar dus gols. Ed ils da Friburg han stuì spetgar exact 50 minutas, fin ch'i ha dà l'emprima giada raschun da sa legrar. Yannick Rathgeb ha marcà l'emprim gol cunter il ferm goli da la squadra tscheca Roman Will. Tar quest'acziun è il goli sa blessà, e ses suppleant ha sulettamain 54 secundas pli tard stuì incassar il segund gol da Friburg tras Ryan Gunderson.

Avant ina culissa da 6'200 aspectaturas ed aspectaturs è la prolungaziun tranter Friburg e Pardubice lura restada senza gols. En il sajettar penaltis n'han nagins giugaders da Friburg gartegià. Grazia a Lukas Radil èsi gartegià als Tschechs da gudagnar il sajettar penaltis ed uschia la partida.

Tgi gudogna il turnier da tradiziun?

Dapi passa 100 onns stat il temp tranter Nadal e Bumaun per ina festa da hockey. A Tavau en las muntognas grischunas s’inscuntran adina la davosa emna da l'onn equipas da hockey da l’entira Europa per cumbatter per la Cuppa Spengler. Il turnier è il pli vegl turnier da hockey dal mund ed ha uschia ina fitg gronda tradiziun. Ed il turnier è il turnier da chasa da l’equipa ospitanta il HCD. Ensemen cun il Team Canada è il HCD campiun da record tar la Cuppa Spengler. Omaduas equipas han gudagnà il turnier da renum gia sedesch giadas.

Ultimas lavurs avant Nadal

La gronda lavur en vista al turnier da quest onn è fatga. Pervia da la lunga tradiziun san ins a Tavau exact co organisar in tal eveniment. Tuttina restan a la fin pitschens detagls nua ch'ils organisaturs han anc da schliar inqual problem.

Lavurs Cuppa Spengler

HCD – il defensur dal titel

Cun grondas ambiziuns parta il Club da hockey da Tavau en la Cuppa Spengler 2024. Suenter plirs onns aveva l’equipa dal trenader Josh Holden gudagnà il december 2023 il turnier da tradiziun. Ed il HCD vul er far questa giada il medem. Dentant è la concurrenza gronda. Sper il HCD ed il Team Canada èn Friburg-Gottéron, Dynamo Pardubice, Kärpät Oulu e Straubing da la Germania da la partida tar la Cuppa Spengler 2024.

Sguard enavos: il 2023 festivescha la Cuppa Spengler ses 100avel anniversari

Avant 100 onns ha il medi Carl Spengler, figl dad Alexander Spengler che ha mess l’emprim crap da fundament dal lieu da cura a Tavau, fundà la Cuppa Spengler. Ses emprim intent è stà da sustegnair il Club da hockey da Tavau, ma a medem temp er da reunir las naziuns daventadas inimis en l'emprima guerra mundiala cun contacts sportivs.