RTR: La stagiun è a fin per igl EHC Cuira. La qualificaziun ha l'equipa terminà sin plazza 6 - quai ch'è stà in success. La seria da quartfinal han els lura pers cun 0:4 encunter Turgovia. Tuna fitg cler. Ha Cuira propi gì nagina schanza?
Gian Carlo Candinas: Na uschè cler n’èsi betg stà. Quai mussan ils differents gieus da la seria. En l’emprim gieu manava Cuira 3:0, ha lura anc pers 3:4 suenter prolungaziun. Era en il gieu dus e trais èsi ditg stà fitg guliv e Cuira ha pers ils gieus pir ellas davosas minutas. Propi cler èsi pir stà en quest quart gieu ier saira ch'els han pers a chasa cun 0:4. En quest gieu han ins propi vis intginas differenzas tranter las duas equipas.
Ti ès stà a guardar quest gieu decisiv. Tge è dà en egl u tge ha fatg la differenza?
L’equipa ha propi pajà daner d'emprendissadi. Els han empruvà sur l’entir gieu tut, han dà cun emoziuns ed engaschi. I han dentant fatg sbagls en ils pli tups muments. Els han er survegnì memia blers chastis, per part cun fouls nunnecessaris. E sez han els pudì dar 5 giadas en powerplay senza nizzegiar questas schanzas.
I ha simplamain mancà il sang fraid en il dretg mument. E la fin finala èsi er stà ina dumonda da qualitad, ier e sur l’entira seria. En quatter gieus ha Cuira sajettà 5 gols. Bler memia paucs natiralmain. Offensiv mancà propi la qualitad per vulair tegnair pitg en ils playoffs a las meglras equipas da la Swiss League.
Ti dias offensiv hai mancà. Ha quai er da far cun il fatg che Cuira ha nagins giugaders esters e quai sco sulett'equipa en la Swiss League?
Gea, quai è segir in motiv. I manca savens ils giugaders che san far la differenza en ils muments decisivs. I è dentant stà la filosofia da l'EHC Cuira da dar senza giugaders esters questa stagiun. Blers fans u er experts han vis quai critic. E malgrà che la stagiun è uss a fin pon ins en mintga cas dir ch’i è ì bain. Ils trenaders Reto e Jan von Arx han integrà fitg blers giugaders giuvens ils ultims mais, giugaders che n’èn betg vegnì da sa metter atras en la National League. Quai ha natiralmain rinforzà l’equipa. Cuira è daventà uschia ina destinaziun attractiva per blers giugaders giuvens.
Malgrà vuschs criticas avant la stagiun èsi grategià al club da fitgar pe en la Swiss League, er senza giugaders esters.
In exempel è l’attatgader grischun Jannik Canova, 23 onns. El ha sur onns empruvà da fitgar pe tar Tavau – quai che n’ha betg propi funcziunà. Lu l’onn passà ha el dà tar Visp en la Swiss League nua ch’el na er betg persvas. Sin questa stagiun è Canova lura vegnì tar l'EHC Cuira ed è vegnì chapitani e topscorer. En totalmain 45 gieus ha el recaltgà 39 puncts da scorer.
Tgè resta uss da questa emprima stagiun en la Swiss League?
En mintga cas ch'il club ha purtà ina tscherta euforia da hockey enavos a Cuira. Tar ils dus gieus da chasa ha l'EHC dastgà benventar 2800 respectiv 2500 aspectaturs en il stadion. L'equipa è puspe preschenta ed in tema en la citad suenter onns ruassaivels enturn il club.
E la stagiun ha er mussà che la via ch'ils responsabels van funcziunà. Ins vul buc far pass memia gronds, na betg investir en chaussas che n’èn betg persistentas. La finamira è propi da s'etablir en la Swiss League e da vegnir in’equipa da tschep en la segund’auta liga sivzra.
La pli auta liga, pia la National League, è lezza in tema insacura?
Na gliez è propi anc nagin tema. Per gliez mancan er anc las finanzas e l’infrastructura e natiralmein stuess era tut vegnir pli professiunal.
Gia uss tschantschar da tals pass è memia baud. Dentant tgi sa tge ch’è en tschintg onns. Ed ils fans lez siemian natiralmain schon da temps glorius cun igl EHC Cuira. Fin il 2002 ha Cuira dà constantamain adina puspè en la pli auta liga.
Or da l'archiv:
Gian Carlo Candinas
Redactur RTR